About Nunavik ParksAbout Nunavik Parkshttp://authoring.nunavikparks.ca

ᓄᓇᕕᒃ ᑕᕐᕋᕙᓯᓐᓂᐸᐅᕗᖅ ᑯᐯᒃ ᓄᓇᖓᓂ. ᑕᒪᓐᓇ ᓄᓇ ᖃᐅᔨᒪᔭᐅᔪᖅ ᒪᓃᑦᑐᒥᒃ ᓄᓇᖃᕐᓂᖓᓄᑦ ᐊᒻᒪᓗ ᑕᑯᑦᓯᐊᓇᕐᑐᒪᕆᐊᓗᓐᓂᒃ ᓯᓚᕐᔪᐊᒥᒃ ᐱᑕᖃᕐ​ᓂᖓᓄᑦ.

ᑌᒪᖕᖓᓛᓂᒃ, ᑕᒪᑐᒪ ᐊᖏᔪᐊᓘᑉ ᓄᓇᐅᑉ ᑎᑭᑦᓴᐅᖏᓐᓂᖓ ᓴᐴᓗᑕᐅᓯᒪᔪᖅ ᐊᕙᑎᒥ ᐱᐅᓯᑐᐃᓐᓇᖏᓐᓄᑦ, ᓄᓇᖓᑕ ᖄᖓᓂᒥᐅᑕᓄᑦ ᐊᒻᒪᓗ ᐆᒪᔪᖏᓐᓄᑦ. ᐱᐅᓂᕐᐹᖁᑎᖏᑦ ᐃᓚᓖᑦ ᑲᑭᐊᓐᓂᐹᖑᖃᑕᐅᔪᒥᒃ ᐱᖑᐊᓗᐃᑦ ᑕᓯᖓᑕ ᐃᒪᖓᓂᒃ ᐊᒻᒪᓗ ᐊᒻᒪᓗᑭᑖᒥᒃ ᐊᕙᓗᐊᓂᒃ, ᖁᒻᒨᓇᓪᓗᑐᕐᑐᓂᒃ ᖃᕐᖃᔪᐊᑦ ᖄᖏᓐᓂᒃ ᑑᕐᙰᑦ ᖃᕐᖃᔪᐊᖏᓐᓂ ᐊᒻᒪᓗ ᖃᓄᐃᑦᑐᑐᐃᓐᓇᓂᒃ ᐆᒪᔪᖃᕐᓂᖓᓂᒃ ᑕᓯᐅᔭᒥ.

ᐱᓇᓱᐊᒐᕗᑦ ᓄᓇᕕᐅᑉ ᒥᕐᖑᐃᓯᕐᕕᖏᓐᓂ ᐃᓕᖓᕗᖅ ᓴᐳᒻᒥᓂᕐᒧᑦ ᐊᒻᒪᓗ ᑕᑯᔭᐅᑎᑦᓯᓂᕐᒧᑦ ᓄᓇᐅᑉ ᖄᖓᓂ ᑕᑯᔭᑦᓴᓂᒃ ᐊᒻᒪᓗ ᑕᑯᔪᒥᓇᕐᑐᓂᒃ ᓄᐃᑦᓯᓯᐊᕐᑐᓂᒃ ᑕᒪᑐᒪ ᓄᓇᐅᑉ ᐊᒻᒪᓗ ᐃᓄᐃᑦ ᕿᒻᒪᖁᓯᐊᕆᓯᒪᔭᖏᓐᓂᒃ. ᐃᑉᐱᒍᓱᑦᓯᐊᓲᖑᕗᒍᑦ ᐱᕙᓪᓕᐊᑎᑦᓯᒐᓱᑦᓱᑕ ᐊᒻᒪᓗ ᐃᖏᕐᕋᑎᑦᓯᒐᓱᑦᓱᑕ ᒥᕐᖑᐃᓯᕐᕕᓂᒃ ᒪᑭᑕᒐᑦᓴᐅᓚᖓᑎᓪᓗᒍ. ᐱᐅᓯᑐᖃᒃᑯᑦ ᐊᒻᒪᓗ ᓱᑯᐃᔦᓂᒃᑯᑦ ᖃᐅᔨᒪᒍᑏᑦ ᑐᑭᒧᐊᑦᑎᓯᒍᑕᐅᕗᑦ ᓄᖑᑎᕆᑦᑌᓕᓂᒃᑯᑦ ᖃᓄᐃᓘᕐᓂᑎᓂᒃ ᐊᒻᒪᓗ ᓱᖃᑦᓯᒍᑎᓂᒃ ᐊᒻᒪᓗ ᐃᓕᓐᓂᐊᕈᑎᓂᒃ ᒥᕐᖑᐃᓯᕐᕕᓂ ᐱᔭᑦᓴᓂᒃ, ᐊᓱᐃᓛᒃ ᓄᓇᓕᓕᒫᓂᒃ, ᓄᓇᕐᔪᐊᒥᒃ ᐊᒻᒪᓗ ᓄᓇᕐᔪᐊᖑᓕᕇᓂᒃ ᐳᓛᕆᐊᕐᓯᒪᔪᑦ ᑕᒪᒃᑯᓇᖕᖓᑦ ᐃᓕᑦᓯᕕᖃᕐᓂᐊᒪᑕ.
ᓄᓇᕕᒻᒥᐅᑦ ᐃᓄᐃᑦ ᐯᕆᑦᓯᔨᐅᕗᑦ ᓄᓇᕕᒻᒥ ᓄᓇᕐᔪᐊᑉ ᒥᕐᖑᐃᓯᕐᕕᖏᓐᓂᒃ. ᐊᑑᑎᖃᕋᒥᒃ ᓴᐳᒻᒥᔨᐅᓂᕐᒥᒃ ᐊᒻᒪᓗ ᑭᒡᒐᐅᓂᕐᒥᒃ ᑖᒃᑯᓄᖓ ᒥᕐᖑᐃᓯᕐᕕᓄᑦ, ᒥᕐᖑᐃᓯᕐᕕᓂ ᐃᓄᐃᑦ ᐱᓇᓱᑦᑏᑦ ᐊᓐᓂᕈᓱᑦᑐᒪᕆᐅᕗᑦ ᑖᒃᑯᓂᖓ ᐊᑦᔨᐅᖏᑦᑐᓂᒃ ᓄᓇᓂᒃ, ᐃᓱᒪᒋᔭᒥᓂᒃ ᐆᒪᑦᓱᑎᒃ ᓄᐃᑕᑦᓯᔪᕐᑎᑐᑦ ᕿᒻᒪᖁᓯᐊᖏᓐᓂᒃ ᐊᒥᕐᖄᕈᑎᑦᓴᖏᓐᓂᒃ ᓴᐳᒻᒥᓗᒋᓪᓗ ᑭᖑᕚᕆᓚᕐᑕᖏᑦ ᐱᑦᔪᑎᒋᓗᒋᑦ.

ᖃᓄᖅ ᓄᓇᕐᔪᐊᑉ ᒥᕐᖑᐃᓯᕐᕕᖏᑦ ᐱᖕᖑᑎᑕᐅᓲᖑᓂᖓᑦ ᓄᓇᕕᐅᑉ ᐃᓗᐊᓂ

ᑐᕐᖃᑕᕐᕕᒃ ᓇᐹᕐᑐᓕᓐᓄᑦ, ᐆᒪᔪᓄᑦ ᐊᒻᒪᓗ ᒥᕐᖑᐃᓯᕐᕕᓄᑦ ᑲᒪᔨᐅᕗᖅ ᐸᕐᓇᓂᕐᒥᒃ ᐊᒻᒪᓗ ᐱᕙᓪᓕᐊᑎᑦᓯᓂᕐᒥᒃ ᑯᐯᑉ ᓄᓇᕐᔪᐊᖓᑕ ᒥᕐᖑᐃᓯᕐᕕᖃᕐᑎᓯᒍᑎᖏᓐᓂᒃ, ᑲᒪᔨᐅᒻᒥᓱᓂᓗ ᑕᒪᒃᑯᐊ ᐊᐅᓚᑕᐅᓂᖏᓐᓂᒃ. ᑖᒃᑯᓂᖓ ᓄᓇᓂᒃ ᐱᐅᓕᑦᓯᒪᓂᐅᑉ ᖁᓛᒍᑦ, ᑲᕙᒪᒃᑯᑦ ᓱᕐᖁᐃᕆᐊᖃᕐᒥᔪᑦ ᐅᐸᒐᑦᓴᐅᓂᖓᓂᒃ ᐃᓄᓕᒫᓄᑦ ᐱᑦᔪᑎᖃᕐᑎᓗᒍ ᐃᓕᓐᓂᐊᓂᕐᒥᒃ, ᖃᐅᔨᒋᐅᕐᓂᒥᒃ ᐊᒻᒪᓗ ᓯᓚᒥ ᓱᖃᑦᓯᓂᕐᒥᒃ, ᑕᒪᒃᑯᐊ ᐊᑐᕐᑕᐅᓂᖏᑦ ᒪᓕᑦᑎᓗᐊᖑᓚᐅᕐᐸᑕ ᐃᓘᓐᓈᒍᑦ ᓴᐳᒻᒥᒍᑕᐅᔪᑦ ᑐᕌᕐᑕᖏᓐᓄᑦ.

ᓄᓇᕕᐅᑉ ᒥᕐᖑᐃᓯᕐᕕᖏᑦ (55° ᖁᓛᓃᑦᑐᑦ) ᐃᖏᕐᕋᑎᑕᐅᕗᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ (KRG). KRG-ᑯᑦ ᑎᓕᔭᐅᓯᒪᒻᒥᔪᑦ ᑲᔪᓯᑎᑦᓯᖁᔭᐅᑦᓱᑎᒃ ᖃᐅᔨᓴᕈᑎᓂᒃ ᑐᕌᕈᑕᐅᓚᖓᔪᓂᒃ ᐱᖕᖑᑎᑦᓯᓂᕐᒧᑦ ᓄᓇᕐᔪᐊᑉ ᒥᕐᖑᐃᓯᕐᕕᖏᓐᓂᒃ ᑕᒫᓂ ᓄᓇᒥ.

1990-ᓂ ᐊᕐᕌᒍᐃᑦ ᐱᒋᐊᕐᖃᒥᐅᑎᓪᓗᒋᑦ, ᓄᓀᑦ ᐆᑦᑑᑎᑦᓴᓚᕆᐅᓂᖏᑦ ᓄᓇᐅᑉ ᐱᐅᓯᑐᐃᓐᓇᖏᓐᓄᑦ ᐅᕝᕙᓘᓐᓃᑦ ᑌᒃᑯᐊ ᓇᔪᕐᑕᐅᔪᑦ ᐊᑦᔨᐅᖏᑦᑐᓄᑦ ᐋᕐᕿᓯᒪᔪᓄᑦ ᓇᓗᓀᕐᑕᐅᓚᐅᕐᓯᒪᔪᑦ ᓴᓂᕐᕙᑕᐅᑦᓱᑎᓪᓗ ᒥᕐᖑᐃᓯᕐᕕᓕᐊᖑᒍᒫᕐᑎᓗᒋᑦ ᑐᕐᖃᑕᕐᕕᐅᑉ ᑎᓕᔨᒍᑎᖓ ᐊᑐᕐᑕᐅᑎᓪᓗᒍ ᑯᐯᒃᑯᑦ ᑲᕙᒪᖓᓄᑦ. ᑖᒃᑯᐊ ᓄᓀᑦ ᑌᒪ ᐃᓚᐅᕐᑑᑕᐅᓕᓚᐅᔪᒻᒥᔪᑦ ᑲᑎᕕᐅᑉ ᓄᓇᖓᑕ ᐊᑐᕐᑕᐅᓂᑦᓴᖏᓐᓂᒃ ᐱᕙᓪᓕᐊᒍᑎᓂᒃ ᐸᕐᓇᓯᒪᐅᑎᒧᑦ, KRG-ᑯᑦ ᓄᐃᑕᖓᓐᓄᑦ.

ᒥᕐᖑᐃᓯᕐᕕᒥᒃ ᐱᖕᖑᑎᑕᐅᔪᖃᖕᖏᓂᖓᓂ, ᓄᓇᓖᑦ ᓱᕐᕋᑕᐅᓚᖓᔪᑦ ᐃᓚᐅᖁᔭᐅᓲᑦ ᖃᐅᔨᒪᔭᑦᓴᓂᐊᕈᑎᓄᑦ ᐊᒻᒪᓗ ᐃᓱᒪᑦᓴᓯᐅᕈᑎᓄᑦ ᑲᑎᒪᓂᕐᓄᑦ, ᑕᒪᑐᒪ ᖃᓄᐃᓘᕐᓂᖓ ᐊᒻᒪᓗ ᐊᑦᑐᐊᒥᔪᑦ ᑲᒪᒋᒋᐊᓖᑦ ᐅᖄᔭᐅᑎᓪᓗᒋᑦ. ᓄᓇᓖᑦ ᐱᕕᖃᕐᑎᑕᐅᓲᑦ ᐊᐱᕐᓱᓂᕐᒥᒃ ᐊᒻᒪᓗ ᐅᖄᓂᕐᒥᒃ ᐱᔪᒪᓂᕐᒥᓂᒃ ᑕᒪᑐᒪ ᐱᓇᓱᑦᑕᐅᓂᖓᓂᒃ. ᐱᔪᒪᔭᐅᑐᐊᕐᒪᑦ, ᐱᓇᓱᖃᑎᒌᑦ ᑌᒪ ᐱᖕᖑᑎᑕᐅᓲᖑᒻᒥᔪᑦ, ᑭᒡᒐᑐᕐᑎᖃᕐᓱᑎᒃ ᐱᓯᒪᔪᓂᒃ ᑯᐯᒃᑯᑦ ᑲᕙᒪᖓᓂᒃ ᐊᒻᒪᓗ ᐊᑦᔨᒌᖕᖏᑐᓂᒃ ᐊᑦᑐᐊᖃᑕᐅᔪᓂᒃ, ᖃᓗᓗᒋᑦ KRG-ᑯᑦ, ᒪᑭᕝᕕᒃ, ᑕᕐᕋᒥᐅᑦ ᓄᓇᓕᖏᑦ ᐊᒻᒪᓗ ᓄᓇᒥᒃ ᑎᒍᒥᐊᕐᑏᑦ ᐊᑦᑐᑕᐅᔪᑦ.

ᑖᒃᑯᐊ ᐱᓇᓱᖃᑎᒌᑦ ᑭᖑᓂᖓᓂ ᓇᓗᓀᕐᓯᓲᖑᒻᒥᔪᑦ ᖃᐅᔨᓴᕐᕕᐅᓚᖓᔪᑦ ᓄᓇᖏᓐᓂᒃ ᑖᒃᑯᓇᓂ KRG-ᑯᑦ ᖃᐅᔨᓴᕈᑎᓂᒃ ᑲᔪᓯᑎᑦᓯᖃᑦᑕᑎᓪᓗᒋᑦ ᑐᑭᓯᓂᐊᕈᑎᒋᑦᓱᒋᑦ ᓄᓇᐅᑉ ᐊᑐᕐᑕᐅᒍᑎᖏᓐᓂᒃ, ᐊᒻᒪᓘᒐᓗᐊᖅ ᓄᓇᐅᑉ, ᐆᒪᔪᐃᑦ ᐊᒻᒪᓗ ᐃᓄᐃᑦ-ᒪᑭᑕᐅᑎᖏᑦᑕ ᐊᕙᑎᖏᓐᓂᒃ. ᑕᒪᓐᓇ ᐃᓚᖃᓲᖅ ᕿᒥᕐᕈᓂᕐᒥᒃ ᐊᓪᓚᒍᑕᐅᓕᓂᕐᓂᒃ ᐱᑦᔪᑎᓕᓐᓂᒃ ᓯᕗᓪᓕᕕᓂᖃᕐᓂᒥᒃ, ᓯᓚᒥᒃ, ᙯᕐᑐᒥᒃ, ᓄᓇᐅᑉ ᐊᓯᑦᔨᐸᓪᓕᐊᓯᒪᓂᖓᓂᒃ, ᐃᑦᓴᓂᑕᕐᓂᐊᓂᕐᒥᒃ ᐊᒻᒪᓗ ᓱᓕ ᐱᕈᕐᑐᓂᒃ ᐊᒻᒪᓗ ᐆᒪᔪᓂᒃ ᓈᓭᑎᓂᒃ. ᓄᓇᓕᒻᒥᐅᑦ ᐃᓄᖏᑦ ᐃᓚᐅᖁᔭᐅᓲᑦ ᓄᓇᒥ ᐱᓇᓱᑦᑐᓄᑦ. ᑕᒪᒃᑯᐊ ᖃᐅᔨᓴᐅᑏᑦ ᐊᑦᔨᒌᖕᖏᑐᑦ ᓄᐃᑕᖏᑦ, ᐊᒻᒪᓗ ᐊᓯᖏᑦ ᐃᓱᒪᒋᒋᐊᖃᕐᒥᔪᑦ (ᑎᑭᑦᓴᐅᓂᖓ, ᐱᒍᑦᔨᒍᑎᖃᕐᓂᖅ ᐊᒻᒪᓗ ᒪᑭᑕᐅᑎᑦᓴᓂᒃ ᐱᕙᓪᓕᐊᓂᖅ) ᓄᐃᑕᐅᓲᖑᒻᒥᔪᑦ ᖃᓄᐃᓕᖓᓂᖓᓂᒃ ᑐᓴᕐᑎᓯᒍᑎᓂ. ᑖᒃᑯᐊ ᑐᓴᕐᑎᓯᒍᑏᑦ ᑐᑭᓕᐊᕐᓯᓚᖓᔪᑦ ᐊᑦᔨᐅᖏᑦᑐᑦ ᐱᐅᓗᖁᑏᑦ ᓇᓪᓕᖏᑦᑕ ᐱᒋᐊᖃᕐᓂᖓᓂᒃ ᐊᑦᔨᐅᖏᑦᑐᓂᒃ ᓄᖑᓴᕐᑕᐅᑌᓕᓂᖓᑕ ᐋᕐᕿᓯᒪᐅᑎᖏᓐᓂᒃ ᐊᒻᒪᓗ ᓇᓪᓕᖏᑦᑕ ᑕᑯᔭᑦᓴᓕᐊᖑᓂᐊᕐᓂᖏᓐᓂᒃ, ᐃᓚᖃᕐᑎᓗᒋᑦ ᒥᕐᖑᐃᓯᕐᕕᐅᑉ ᐅᐸᒍᒥᓇᕐᓂᐹᖏᓐᓂᒃ.

ᐱᕙᓪᓕᐊᒍᑎᓂᒃ ᐸᕐᓇᓯᒪᐅᑏᑦ

ᑯᐯᒃᑯᑦ ᑲᕙᒪᖓᑦ ᖃᓄᐃᓕᖓᓂᖓᓂᒃ ᑐᓴᕐᑎᓯᒍᑎᓂᒃ ᐊᒻᒪᓗ ᐱᓇᓱᖃᑎᒌᑦᑐᑦ ᐋᕐᕿᑕᐅᖁᔨᒍᑎᖏᓐᓂᒃ ᐊᑐᓲᖑᕗᖅ ᑐᑭᒧᐊᑦᑎᓯᒍᑎᒋᑦᓱᒋᑦ ᐱᕙᓪᓕᐊᒍᑎᓂᒃ ᐸᕐᓇᓯᒪᐅᑎᒥᓂᒃ, ᐅᖄᔪᓂᒃ ᑌᑲᓂ ᓄᓇᒥ ᓄᖑᑎᕆᑦᑌᓕᓂᒃᑯᑦ ᑯᒻᒪᓇᓚᖓᔪᓂᒃ ᐊᒻᒪᓗ ᐱᕙᓪᓕᐊᕕᐅᒍᓇᕐᓂᒃ (ᓱᓇᓐᓂᐊᕕᑦᓴᐅᓂᖏᓐᓂᒃ ᐊᒻᒪᓗ ᐱᒍᑦᔨᒍᑎᑦᓴᖏᓐᓂᒃ). ᑖᓐᓇ ᐸᕐᓇᓯᒪᐅᑎᖓ ᐅᖃᓚᖓᒻᒥᔪᖅ ᒥᕐᖑᐃᓯᕐᕕᐅᑉ ᑭᓪᓕᖏᓐᓂᒃ ᐊᒻᒪᓗ ᐊᕕᑦᑐᓯᒪᓂᖏᓐᓂᒃ.

ᒪᑭᑕᐅᑎᓂᒃ, ᐊᕙᑎᒥᒃ ᐊᒻᒪᓗ ᐃᓄᓐᓂᒃ ᓱᒻᒣᒍᑎᓂᒃ ᖃᐅᔨᓴᕈᑏᑦ ᑭᖑᓂᖓᓂ ᑲᔪᓯᑎᑕᐅᓲᖑᒻᒥᔪᑦ ᐃᒻᒥᓂᕿᔪᓄᑦ ᑎᒥᓄᑦ ᕿᒥᕐᕈᒍᑕᐅᑦᓱᑎᒃ ᐋᕐᕿᑕᐅᓯᒪᔪᓂᒃ ᐱᕙᓪᓕᐊᒍᑎᓂᒃ ᐸᕐᓇᓯᒪᐅᑎᒥ. ᑕᒪᓐᓇ ᐱᔭᕇᑐᐊᕐᒪᑦ, ᐃᓄᓕᒫᓂᒃ ᑐᓴᕆᐊᕐᓯᒪᓃᑦ ᑲᔪᓯᑎᑕᐅᓲᖑᒻᒥᔪᑦ ᑲᑎᕕᒃ ᐊᕙᑎᖃᑦᓯᐊᕆᐊᖃᕐᓂᒧᑦ ᑐᑭᑖᕐᑐᐃᔨᓄᑦ (KEQC) ᐊᒻᒪᓗ ᑯᐯᒃᑯᑦ ᑲᕙᒪᖓᓄᑦ ᓄᓇᓕᓐᓂ ᐱᓇᓱᑦᑕᐅᔪᑦ ᓱᕐᕋᑕᖏᓐᓂ. ᑖᒃᑯᐊ ᒪᕐᕈᐃᑦ ᑐᓴᕆᐊᕐᓯᒪᓃᑦ ᐊᑕᐅᑦᓯᑯᑦ ᐊᑐᕐᑕᐅᒍᓐᓇᑐᑦ. ᑖᒃᑯᐊ ᓄᓇᕕᐅᑉ ᒥᕐᖑᐃᓯᕐᕕᖏᓐᓂᒃ ᐱᕕᖃᕐᑎᓯᒍᑕᐅᕗᑦ ᐱᓇᓱᑦᑕᒥᓂᒃ ᓄᐃᑦᓯᓂᕐᒥᒃ ᓄᓇᓕᓐᓄᑦ ᐊᒻᒪᓗ ᑭᐅᒪᓂᕐᒥᒃ ᓇᐅᑐᐃᓐᓇᓂᒃ ᐊᐱᕐᓲᑎᑦᓴᓂᒃ ᐃᓄᐃᑦ ᐃᓱᒪᒋᑐᐃᓐᓇᕆᐊᓕᖏᓐᓂᒃ. ᑕᒡᒐᓂ ᑕᒐ ᓄᓇᓕᒻᒥᐅᑦ ᐅᖃᕈᓐᓇᓲᖑᕗᑦ ᐃᓱᒫᓗᒋᔭᒥᓂᒃ ᐊᒻᒪᓗ ᐃᓱᒪᖃᕈᑎᒥᓂᒃ ᐱᓇᓱᑦᑕᐅᔫᑉ ᒥᑦᓵᓄᑦ. ᓄᓇᓕᒻᒥᐅᑦ ᐅᖃᐅᓯᑦᓭᔭᕈᑎᖏᑦ ᐃᑲᔪᓲᑦ ᑲᕙᒪᒃᑯᓂᒃ ᐱᐅᓯᒋᐊᕐᑎᓯᒍᑕᐅᑦᓱᑎᒃ ᐱᕙᓪᓕᐊᒍᑏᑦ ᐸᕐᓇᓯᒪᐅᑎᖏᓐᓂᒃ, ᐊᑐᕐᓂᐊᑐᓂᒃ ᓴᖑᐊᑦᓯᒍᑎᒋᓗᒋᑦ ᒥᕐᖑᐃᓯᕐᕕᓂᒃ ᑲᒪᔩᑦ ᓱᓂᖏᓐᓂᒃ ᐱᕕᓕᐅᕈᑎᒋᓗᒋᓪᓗ KEQC-ᑯᑦ ᑭᖑᓪᓕᐹᒥᒃ ᑐᑭᑖᕐᓂᖓᓂᒃ.

ᐱᓇᓱᑦᑕᐅᔪᖅ ᑌᒪ ᐋᑕᐅᓲᖑᒻᒥᔪᖅ ᑯᐯᒃᑯᑦ ᑲᕙᒪᖓᓄᑦ ᐊᓚᒃᑲᑕᐅᑦᓱᓂᓗ ᑯᐯᒃᑯᑦ ᐋᕐᕿᑕᒥᓂᒃ ᑐᓴᐅᒪᓇᕐᑎᑦᓯᒍᑎᖏᓐᓂ. ᑌᒪ, ᐊᖏᕐᑕᐅᐸᑦ, ᑲᕙᒪᒃᑯᑦ ᑲᔪᓯᒍᓐᓇᓂᐊᓕᕐᒪᑕ ᒥᕐᖑᐃᓯᕐᕕᒥᒃ ᐱᖕᖑᐃᓂᕐᒧᑦ ᐊᒻᒪᓗ ᑕᒪᑐᒪ ᑭᖑᓂᖓᓂ, ᓄᓇᕕᐅᑉ ᒥᕐᖑᐃᓯᕐᕕᖏᑦᑕ ᐊᐅᓚᓂᐊᓕᕐᒪᐅᒃ.​

menu-whiteFooter