JBNQAJBNQAhttp://authoring.nunavikparks.ca

ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᖅ

1971-ᖑᑎᓪᓗᒍ, ᑯᐯᒃᑯᑦ ᑲᕙᒪᖓᑦ ᑐᓴᕐᓴᕈᕐᑎᓯᓚᐅᕐᓯᒪᔪᖅ ᔦᒻᔅ ᐯᒥ ᐃᒪᕐᒧᑦ ᐃᑯᒪᓕᐅᕈᑏᑦ ᓴᓇᔭᐅᓂᖓᑕ ᐱᓇᓱᑦᑕᐅᓯᓂᖓᓂᒃ, ᖄᖏᓐᓈᓗᑐᕐᓱᑎᒃ ᐱᔪᓐᓇᓂᖃᕈᑎᖏᓐᓂᒃ ᐃᓄᐃᑦ ᐊᒻᒪᓗ ᑯᔩ ᐃᓅᔪᑦ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᓄᓇᖏᓐᓂ. ᑖᒃᑯᐊ ᒪᕐᕈᐃᑦ ᓄᓇᖃᕐᖄᓯᒪᔪᑦ ᐊᑐᓲᖑᖏᓐᓇᓚᐅᕐᓯᒪᔪᑦ ᐱᐅᓯᑐᖃᕐᒥᓂᒃ ᐃᓅᒍᓯᕐᒥᒃ, ᐃᓚᖃᕐᑎᓗᒍ ᐃᓅᒍᑎᒋᑦᓱᒋᑦ ᐊᓐᓂᑐᖃᑦᑕᓂᕐᒥᒃ ᓄᓇᒥ ᐊᒻᒪᓗ ᑕᕆᐅᒥ ᐆᒪᔪᓂᒃ. ᐊᒥᓱᑦ ᓱᓕ ᐊᑐᖏᓐᓇᓚᐅᕐᓯᒪᔪᑦ ᐆᒪᔪᕐᓂᐊᓂᕐᒥᒃ, ᐃᖃᓗᓐᓂᐊᓂᕐᒥᒃ ᐊᒻᒪᓗ ᒥᑭᒋᐊᕐᓂᐊᓂᕐᒥᒃ ᐃᓅᑦᔪᑎᑐᐊᕆᑦᓱᒍ.

ᓄᕕᒻᐱᕆ 11, 1975-ᒥ, ᑯᔩ ᐊᒻᒪᓗ ᐃᓄᐃᑦ ᑯᐯᒻᒥᐅᑦ ᐊᑎᓕᐅᖃᑕᐅᓚᐅᕐᓯᒪᔪᑦ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᒥᒃ (JBNQA) ᐃᓚᖃᕐᓱᑎᒃ ᑲᕙᒪᒃᑯᓂᒃ ᑳᓇᑕᒥ ᐊᒻᒪᓗ ᑯᐯᒻᒥ, ᔦᒻᔅ ᐯᒥ ᐱᕙᓪᓕᐊᓂᕐᒧᑦ ᑎᒥᒥᒃ, ᔦᒻᔅ ᐯᒥ ᐃᑯᒪᓕᐅᕐᓂᒧᑦ ᑎᒥᒥᒃ, ᐊᒻᒪᓗ ᑯᐯᒃᑯᑦ ᐃᑯᒪᓕᐅᕐᑎᖏᓐᓂᒃ. JBNQA ᐊᑖᒍᑦ, ᓄᓇᖃᕐᖄᓯᒪᔪᑦ ᓄᓇᓕᖏᑦ ᑕᒫᓂ ᓄᓇᒥ ᑕᐅᕐᓯᐅᑎᖃᓚᐅᕐᓯᒪᔪᑦ ᐱᖃᕐᓂᕋᐅᑎᒥᓂᒃ, ᐱᔪᓐᓇᓂᕐᒥᓂᒃ ᐊᒻᒪᓗ ᑯᒻᒪᓲᑎᒥᓂᒃ ᓄᓇᒥ ᐊᓯᖏᓐᓄᑦ ᐱᔪᓐᓇᓂᕐᓄᑦ ᐊᒻᒪᓗ ᐃᓱᕐᕆᒍᑎᓄᑦ ᐊᖏᖃᑎᒌᓐᓂᐅᑉ ᐃᓗᐊᓂ ᐅᖃᕐᑕᐅᔪᓄᑦ. ᑖᓐᓇ JBNQA ᓯᕗᓪᓕᐸᐅᓚᐅᕐᓯᒪᔪᖅ ᓄᑖᔭᒥᒃ ᓄᓇᑖᕐᓂᒧᑦ ᐊᖏᖃᑎᒌᒍᑎᓕᐅᕈᑕᐅᑦᓱᓂ ᑳᓇᑕᒥ, ᐊᒻᒪᓗ ᒪᑭᑦᓯᓚᐅᕐᓯᒪᕗᖅ ᐃᓄᐃᑦ ᐱᖃᕐᓂᖓᓐᓂᒃ ᓄᓇᓂᒃ ᑯᐯᑉ ᐅᑭᐅᕐᑕᑐᖓᓂ. ᑌᑦᓱᒪᓂᐅᑎᓪᓗᒍ, ᐊᓯᐊᓂᒃ ᐊᖏᖃᑎᒌᒍᑎᒥᒃ ᑌᒫᑎᒋᒃ ᐊᖏᔪᓕᒐᕐᑐᒥᒃ ᐱᑕᖃᓚᐅᕐᓯᒪᖕᖏᑐᖅ ᐊᒥᐊᔨᑫᑦ ᑕᕐᕋᖓᓂ.

JBNQA ᐃᓗᓕᖃᕐᖁᖅ ᐊᒥᓱᐊᓗᓐᓂᒃ ᐋᕐᕿᓯᒪᐅᑎᓂᒃ ᐊᑦᑐᐊᔪᓂᒃ ᖃᓄᖅ ᓄᓇᐅᑉ ᐊᕕᒍᑕᐅᒋᐊᖃᕐᓂᖓᓄᑦ ᐊᒻᒪᓗ ᓴᑑᑎᓄᑦ ᐊᑭᓕᕐᑐᓴᓄᑦ ᑯᔩᓄᑦ ᐊᒻᒪᓗ ᐃᓄᓐᓄᑦ. ᓴᐳᒻᒥᔭᓕᒃ ᐱᐅᓯᑐᖃᕐᒥᒍᑦ ᐱᔪᓐᓇᓂᖏᓐᓂᒃ ᐃᓄᐃᑦ ᓄᓇᕕᒻᒥ ᐊᒻᒪᓗ ᖃᓗᓯᑦᓱᓂ ᐊᑦᔨᒌᖕᖏᑐᐹᓗᓐᓂᒃ ᐱᓇᓱᐊᒐᒻᒪᕆᓐᓂᒃ, ᐆᑦᑑᑎᒋᓗᒋᑦ ᐆᒪᔪᕐᓯᐅᓂᖅ, ᐃᖃᓗᓐᓂᐊᓂᖅ ᐊᒻᒪᓗ ᒥᑭᒋᐊᕐᓂᐊᓂᖅ, ᐊᒻᒪᓗᒋᐊᓪᓚᒃ ᐊᕙᑎᐅᑉ ᓴᐳᑎᔭᐅᒪᓂᖓ, ᐱᑦᓴᖁᑏᑦ ᐊᐅᓚᑕᐅᓂᖓ, ᑲᕙᒫᐱᓐᓂ ᓇᑉᐸᑎᕐᓯᒪᔪᑦ, ᒪᑭᑕᐅᑏᑦ ᐱᕙᓪᓕᐊᓂᖓᑦ, ᐃᓕᓐᓂᐊᓂᖅ, ᐃᓗᓯᓕᕆᓂᖅ ᐊᒻᒪᓗ ᐃᓄᓕᒫᓂᒃ ᐊᐅᓚᑦᓯᔨᐅᓂᖅ, ᐊᒥᓲᖕᖏᑐᓂᐅᓐᓃᑦ ᐅᖃᕐᓗᓂ. ᓱᓕᐅᒻᒥᔪᖅ, ᓄᓇᐅᑉ ᒪᓕᒐᖏᑦ ᒪᑭᑕᐅᓚᐅᕐᓯᒪᒻᒥᔪᑦ ᑕᒪᐅᖓ ᓄᓇᒧᑦ JBNQA ᐊᑖᒍᑦ, ᐊᕕᑦᑐᓱᒍ ᓄᓇ ᑳᑎᑯᔨ I, II ᐊᒻᒪᓗ II ᓄᓇᖏᓐᓄᑦ ᐊᒻᒪᓗ ᐱᔪᓐᓇᓂᕆᔭᐅᔪᑦ ᐊᑐᓂ ᐊᕕᑦᑐᓯᒪᐅᑎᒥ ᓇᓗᓀᑦᓯᐊᓱᒋᑦ.

ᐃᓄᐃᑦ ᐱᔪᓐᓇᓂᖃᕈᑎᖏᑦ ᒥᕐᖑᐃᓯᕐᕕᓂ ᓄᓇᕕᐅᑉ ᐃᓗᐊᓂ

ᐱᔪᓐᓇᓂᕆᔭᐅᔪᑦ ᐃᓄᓐᓄᑦ ᐃᓚᐅᔪᓄᑦ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᒥ ᓲᖑᓂᕐᓴᐅᕗᑦ ᒥᕐᖑᐃᓯᕐᕕᒥ ᒪᓕᒐᕐᓂᒃ ᓄᓇᕕᐅᑉ ᐃᓗᐊᓂ (ᐆᑦᑑᑎ: ᖁᑭᐅᓯᔭᕆᐊᖃᖕᖏᓂᖅ, ᐃᑯᐊᓚᑦᓯᒋᐊᖃᖕᖏᓂᖅ ᐊᒻᒪᓗ ᓇᐹᕐᑐᓂᒃ ᓇᑲᑎᕆᒋᐊᖃᖕᖏᓂᖅ ᐊᑐᖕᖏᑐᑦ ᐃᓄᓐᓄᑦ).

ᑌᒣᓕᖓᒐᓗᐊᕐᑎᓗᒍ, ᐊᑦᑕᓇᕐᑐᖃᕐᑌᓕᓂᖅ ᐱᑦᔪᑎᒋᑦᓱᒍ ᐱᐅᓯᐅᖁᓇᓪᓚᕆᑉᐳᖅ ᐃᓚᐅᔪᓕᒫᑦ ᐊᓪᓚᖃᑦᑕᑎᓪᓗᒋᑦ ᐃᑎᕐᑐᑦ ᐊᓪᓚᑕᐅᒪᒍᑎᖏᓐᓂᒃ ᒥᕐᖑᐃᓯᕐᕕᐅᑉ ᐳᓛᕐᑎᓕᕆᕕᖓᓂ ᖃᖓᑐᐃᓐᓇᖅ ᒥᕐᖑᐃᓯᕐᕕᐅᑉ ᐃᓗᐊᓄᑦ ᒪᙯᒋᐊᖕᖏᓂᕐᒥᓂ. ᐃᓄᐃᑦ ᐳᓛᕐᑐᑦ ᐅᖃᖃᑦᑕᖁᓇᕐᒥᔪᑦ ᒥᕐᖑᐃᓯᕐᕕᒥᒃ ᐅᑎᕐᓂᑕᒫᑦ ᒪᙯᒌᕐᓯᒪᓕᕈᑎᒃ. ᑖᒃᑯᐊ ᐱᐅᓯᐅᖁᔭᐅᒐᓗᐊᕐᓱᑎᒃ ᐱᖁᔭᐅᑦᔭᖏᑦᑐᑦ.

ᐊᑦᔨᐅᖏᑦᑐᒥᒃ ᐊᑭᖃᕐᑎᓯᒍᑎ JBNQA-ᒥ ᐃᓚᐅᔪᓄᑦ

ᐃᓚᐅᔪᐃᑦ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᒥ (JBNQA) ᐱᒍᓐᓇᑐᑦ ᒥᕐᖑᐃᓯᕐᕕᒧᑦ ᐱᑦᔪᔭᐅᒍᑎᓂᒃ ᐊᑭᑭᓐᓂᓴᐅᑎᓪᓗᒋᑦ. ᐅᖃᕐᓗᓯ ᐱᓇᓱᑦᑎᓄᑦ ᒥᕐᖑᐃᓯᕐᕕᓂ ᑕᑯᓂᐊᕈᒪᔭᓯᓐᓂ ᖃᐅᔨᒋᐊᑦᓯᐊᕈᒪᒍᑦᓯ.

JBNQA-ᒥ ᐃᓚᐅᔪᑦ ᓱᓕᒋᐊᓪᓚᒃ ᖃᓗᔭᐅᖕᖏᒥᔪᑦ ᐊᑭᓖᒋᐊᖃᕐᓂᒧᑦ ᒥᕐᖑᐃᓯᕐᕕᒧᑦ ᐃᑎᕐᓂᐊᓗᓂ ᐊᒻᒪᓗ ᐊᑐᕐᓂᐊᓗᓂ ᒥᕐᖑᐃᓯᕐᕕᐅᑉ ᐃᓪᓗᖁᑎᖏᓐᓂᒃ.​

menu-whitePlan-Visit