National Park Ulittaniujalik: The Nunavik Parks Family is Growing National Park Ulittaniujalik: The Nunavik Parks Family is Growing 14/10/2016 4:00:00 AM

ᓄᐃᑕᐅᓯᒪᓕᕐᑎᓗᒋᑦ ᒥᕐᖑᐃᓯᕐᕖᑦ ᐱᖑᐊᓗᐃᑦ (2004), ᑰᕈᕐᔪᐊᖅ (2009) ᐊᒻᒪᓗ ᑐᕐᓱᔪᖅ (2013), ᓄᓇᓕᓕᒫᒥᐅᑦ ᓵᑦᓯᓕᓚᐅᔪᒻᒥᔪᑦ ᑲᒪᒋᔭᖃᓯᑦᓱᑎᒃ ᐅᓕᑦᑕᓂᐅᔭᓕᒻᒥᒃ. ᐃᓂᖃᕐᓱᓂ ᐊᑦᔨᐅᖏᑦᑐᒥ ᐊᕙᑎᖓ, ᑖᓐᓇ ᐅᖑᒪᔭᐅᔪᖅ ᓄᓇ ᐊᒻᒪᓗ ᖃᕐᖄᓗᖏᑦ ᓴᓇᒻᒪᓯᔭᐅᓯᒪᔪᑦ ᐅᑎᕐᐸᓕᐊᓂᖓᓄᑦ ᐊᑯᓂᓂᑕᒻᒪᕆᐅᑉ ᓯᑯᐊᓗᒻᒧᑦ ᑕᓯᖕᖑᓚᐅᕐᑐᕕᓂᐅ: ᐃᓂᖏᑦ ᓯᑦᔭᕆᓚᐅᕐᑕᕕᓂᖏᑦᑕ ᓂᑦᑕᓚᕆᑦᑐᐃᑦ ᓱᓕ ᓄᓇᓕᒫᖓᓂ ᑖᕙᑦᓱᒪ. ᖃᐅᔨᒪᔭᐅᔪᖅ ᐊᑦᓯᔭᐅᓯᒪᑦᓱᓂ ᐃᓄᓐᓄᑦ ᐊᒻᒪᓗ ᓇᔅᑲᐱᓄᑦ 'ᓯᑦᔭᑕᖃᕐᓂᕋᕐᑕᐅᓱᓂ'. ᖃᐅᔨᓴᕆᐊᕐᓯᒪᔪᑦ ᒥᕐᖑᐃᓯᕐᕕᐅᑉ ᓄᓇᖓᓂᒃ ᐊᑦᔨᒌᖕᖏᑐᕐᑕᓕᒻᒥᒃ ᐊᒻᒪᓗ ᐊᒥᓱᐃᓂᒃ ᐆᒪᔪᕐᑕᖃᕐᓱᓂ ᐱᕈᕐᑐᑕᖃᕐᓱᓂᓗ ᕿᒥᕐᕈᓯᐊᕈᓐᓇᖃᑦᑕᓛᕐᑐᑦ ᐊᒥᓱᐃᓂᒃ ᓯᓚᒥ ᓱᖃᑦᓯᓂᖃᕐᓗᑎᒃ: ᖃᔭᕆᐊᕐᑐᑐᑦ-ᓯᓂᑦᑕᕋᕐᑐᑦ, ᐱᓱᖕᖑᐊᑐᑦ, ᒪᐅᔭᕇᒃᑯᓯᔭᕐᑐᑦ, ᐊᐳᑎᒃᑯᑦ ᐃᑕᒐᒻᒥᒍᑦ ᓯᑐᕋᐅᓯᔭᕐᓱᑎᒃ ᐱᓱᑦᑐᑦ, ᕿᒧᑦᓯᑐᑦ ᐊᒻᒪᓗ ᐊᓯᖏᑦ. ᒥᕐᖑᐃᓯᕐᕕᒃ ᐅᒃᑯᐃᐸᑦ ᐃᖏᕐᕋᓯᓗᓂ ᐃᓗᐃᒃᑲᓂᒃ ᓱᖃᑦᓯᑎᑕᐅᓂᖃᕈᓐᓇᓯᓛᕐᑐᑦ ᒪᓕᑦᑎᖃᕐᓗᑎᒃ ᐊᒻᒪᓗ ᐃᒻᒥᓂᕐᓱᓗᑎᒃ ᓈᒻᒪᑐᓂᒃ ᐃᓘᓐᓀᓄᑦ ᐱᔪᓐᓇᑕᓕᓐᓄᑦ ᐊᑦᔨᒌᖕᖏᑐᓂᒃ.

 

ᒥᕐᖑᐃᓯᕐᕕᐅᑉ ᐱᕙᓪᓕᐊᓂᖓ

ᐆᒥᖓ ᐊᑎᖃᕐᑎᑕᐅᕐᖄᓯᒪᔪᖅ Monts-Pyramides ᓄᓇᓕᒫᒥ ᒥᕐᖑᐃᓯᕐᕕᓕᐅᕐᓂᒧᑦ ᐱᓇᓱᒐᖅ ᑌᔭᐅᓚᕿᐅᑎᒋᑦᓱᒍ ᓄᓇᐅᑉ ᓴᓇᒻᒪᖃᕐᓂᖓᓄᑦ, ᐅᓕᑦᑕᓂᐅᔭᓕᒃ ᐃᓕᒪᕕᐅᔪᖅ ᐃᓘᓐᓇᖓᓄᑦ ᐊᓐᓂᓇᕐᓂᖓᓄᑦ George River ᑲᖏᕐᓱᐊᓗᑦᔪᐊᑉ ᑰᖓᑕ ᖃᑦᓯᑐᕐᑕᖓᓂ. ᐃᓇᖁᓇᕐᑐᒪᕆᒃ ᓇᐹᕐᑐᑕᖃᖕᖏᑐᖅ ᒪᑐᒣᔪᖅ ᑲᑦᓯᑐᐊᓗᖓᓂᒃ, ᒥᑭᔪᕐᓓᑦ ᓇᐹᕐᑐᐃᑦ ᓇᕐᓴᖏᓐᓃᑎᓗᒋᑦ. ᖃᑦᓯᑐᕐᑕᖓ ᐱᐊᕐᕿᐅᕕᐅᓲᖅ ᑐᑦᑐᓄᑦ ᐊᕐᓇᓄᑦ ᑲᑎᒪᔪᓄᑦ George River-ᐅᑉ ᑐᑦᑕᖐᓚᔭᐅᓲᓄᑦ. ᑕᕐᕋᒦᒐᓗᐊᕐᓱᓂ, ᒥᕐᖑᐃᓯᕐᕕᐅᑉ ᐆᒪᔪᕐᑕᖏᑦ ᐊᑦᔨᒌᖕᖏᑐᒻᒪᕇᑦ ᐊᒻᒪᓗ ᑖᕙᓂ ᑭᓯᐊᓂ ᐃᓂᖃᓲᑦᓴᔭᐅᑦᓱᑎᒃ. ᒥᕐᖑᐃᓯᕐᕕᒥ ᑕᑯᑦᓴᐅᒍᓐᓇᑐᑦ ᐆᒪᔪᐃᑦ 100 ᐅᖓᑖᓃᑦᑐᑦ ᓱᓇᐅᓂᖏᑦ ᐊᑦᔨᒌᖕᖏᑐᑦ ᐊᒫᒪᑦᑎᓯᔩᑦ, ᑎᒻᒥᐊᑦ ᐊᒻᒪᓗ ᐃᖃᓗᐃᑦ, ᐃᓚᐅᑎᓪᓗᒋᑦ ᐊᒪᕈᐃᑦ, ᑐᑦᑕᐃᑦ, ᐊᑦᓭᑦ, ᓇᑦᑐᕋᓖᑦ, ᕿᓐᓄᐊᔪᐊᑦ, ᓵᒣᑦ ᐊᒻᒪᓗ ᐃᖃᓗᑉᐲᑦ.

ᐃᓘᓐᓇᑎᒃ ᑌᒣᒻᒥᒪᑕ ᓄᓇᕕᒻᒥ ᒥᖕᖑᐃᓯᕐᕖᑦ, ᓄᓇᐅᑉ ᐊᕙᑎᖓ ᖃᓄᐃᓕᖕᖓᓯᒪᒐᓛᖕᖏᑐᖅ ᐅᓕᑦᑕᓂᐅᔭᓕᒻᒥ ᐅᓪᓗᒥᐅᓕᕐᑐᖅ ᓯᓚᕐᔪᐊᒥ ᑌᒣᑦᑐᖃᑦᓯᐊᕈᓐᓀᑎᓗᒍ ᓱᓇᓱᐊᕐᕕᐅᓚᐅᕐᓯᒪᖕᖏᑐᓂᒃ. ᒪᓂᔨᓯᒪᕕᐅᖃᑦᑕᓛᕐᑐᖅ ᐱᐅᓯᖃᓪᓚᕆᑦᑐᓂᒃ ᓄᓇᒥᒃ ᐱᑕᖏᓐᓂᓗ ᑕᑯᒐᑦᓴᓯᐊᓂᒃ ᑕᑯᔭᕐᑐᑎᑦᓯᕕᐅᓗᓂ ᓄᓇᓕᓐᓂ ᒪᓕᑦᑏᑦ ᓯᕗᓕᕐᑎᒋᔭᐅᑎᓗᒋᑦ ᐅᐱᒪᒋᔭᖃᕐᓗᑎᒃ ᐱᕙᓪᓕᑎᑦᓯᒋᐊᕐᓗᑎᓗ ᓄᓇᒥᑕ ᑕᑯᔭᕐᑐᑕᐅᓂᖓᓂᒃ: ᑲᖏᕐᓱᐊᓗᑦᔪᐊᑉ ᑰᖓ, Ford River ᑰᒃ ᐊᒻᒪᓗ ᖃᕐᖄᓗᒃ Mount Pyramid. ᐊᑦᔨᐅᖏᓐᓂᖓ ᓄᓇᐅᑉ ᓄᐃᑕᑦᓯᐊᑎᑕᐅᔪᖅ ᐊᑐᕐᑕᐅᓲᒍᐃᓐᓈᒪᑦ ᐃᓄᒥᓄᑦ ᓄᓇᓕᓕᒫᖓ ᒪᙯᕝᕕᐅᒋᐊᕐᑐᓯᒪᑦᓱᓂ.

ᑯᐯᒻᒥ ᒥᕐᖑᐃᓯᕐᕖᑦ

ᑲᓇᑕᒥ ᒥᕐᖑᐃᓯᕐᕕᐅᓂᕐᒥᓄᑦ ᐃᖏᕐᕋᓯᑎᑕᐅᓯᒪᔪᑦ ᓇᓂᓕᒫᖅ ᐊᒻᒪᓗ ᑯᐯᒻᒥ ᒥᕐᖑᐃᓯᕐᕖᑦ ᐊᐅᓚᑕᐅᓂᓖᑦ ᐱᐅᓯᑦᓴᔭᖏᑦ ᑖᒃᑯᓭᓐᓇᐅᑎᑕᐅᖏᓐᓇᓱᑎᒃ ᓄᓇᒥᒃ ᐊᒻᒪᓗ ᐃᓗᒡᒍᓯᒧᐊᖓᔪᓂᒃ ᕿᒻᒪᑯᑎᑦᓴᔭᓂᒃ ᓄᐃᑕᖏᓐᓇᑎᑦᓯᐅᑕᐅᓚᖓᑦᓱᑎᒃ ᐊᒻᒪᓗ ᑭᓇᑐᐃᓐᓇᑯᓐᓄᑦ ᑕᑯᔭᕐᑐᑕᐅᒍᓐᓇᓱᑎᒃ. ᓄᓇᕕᒻᒥ ᒥᕐᖑᐃᓯᕐᕖᑦ ᐊᐅᓚᑕᐅᓂᖏᑦᑕ ᐊᑖᒍᑦ, ᐅᓕᑦᑕᓂᐅᔭᓕᒃ ᐱᔭᐅᓯᒪᔪᖅ ᐊᕐᕌᒍᓂ ᐱᖓᓱᔫᕐᑐᓂ ᐱᓇᓱᐊᖃᑎᒌᒍᑕᐅᑦᓱᓂ ᓄᓇᓕᑐᐃᓐᓇᒥᐅᓄᑦ, ᓄᓇᓖᑦ ᑲᕚᒫᐱᖏᓐᓄᑦ ᐊᒻᒪᓗ ᓄᓇᒥᒃ ᑎᒍᒥᐊᕐᑎᑯᓐᓄᑦ, ᓱᑯᐃᔦᔨᓄᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄ, ᒪᑭᕝᕕᒃ ᑯᐊᐳᔦᓴᒧᑦ, ᐊᒻᒪᓗ Ministère des Forêts, de la Faune et des Parcs (ᓇᐹᕐᑐᐃᑦ, ᐆᒪᔪᐃᑦ ᐊᒻᒪᓗ ᒥᕐᖑᐃᓯᕐᕖᑦ). ᒪᓕᓪᓗᒋᑦ ᐱᓚᕿᑎᒋᐊᕐᑕᖓ ᑳᓇᑕᒥ ᒥᕐᖑᐃᓯᕐᕖᑦ ᑯᐯᒻᒦᑐᑦ, ᑖᓐᓇ ᒥᕐᖑᐃᓯᕐᕕᒃ ᐃᓱᕐᕆᓇᕐᑎᓯᓚᖓᔪᖅ ᖃᐅᔨᔭᐅᒋᐊᕐᓂᖏᓐᓂᒃ ᑖᑦᓱᒪ ᐅᖑᒪᔭᐅᒋᐊᓕᐅᑉ ᓄᓇᐅᑉ, ᐊᒻᒪᓗ ᐱᐅᓯᓪᓚᕆᖓᑕ ᐃᓗᒡᒍᓯᖃᕐᓂᑎᒍᓗ ᐱᑕᖃᓪᓚᕆᓐᓂᖓᓂᒃ.

ᐊᓐᓂᓇᕐᑐᖅ ᐃᓗᒡᒍᓯᑎᒍᑦ ᐊᒻᒪᓗ ᐱᕙᓪᓕᐊᓯᒪᓂᑎᒍᑦ ᕿᒻᒪᖁᑎᑦᓴᖅ

ᓄᓇᖃᕐᖄᑐᕕᓃᑦ ᐊᒻᒪᓗ ᐃᓄᐃᑦ ᓴᓇᒻᒪᑖᕐᑎᓯᓯᒪᔪᑦ ᓇᓗᓀᕐᑕᐅᒍᑎᖏᓐᓂᒃ ᐊᒻᒪᓗ ᐱᕙᓪᓕᐊᓯᒪᓂᖏᓐᓂᒃ ᑯᐯᑉ ᑕᕐᕋᖓᑕ, ᐊᒻᒪᓗ ᑌᒣᑦᓯᒪᒋᐊᖏᑦ ᑕᑯᔭᐅᓯᒪᒻᒥᒪᑕ ᐊᒥᓱᑦ ᑐᓂᐊᕐᑕᓂᐊᕐᕕᓭᑦ ᓇᓗᓀᕐᑕᐅᓯᒪᔪᑦ ᑖᕙᑦᓱᒪ ᑕᕐᕋᖓᓂ ᐊᒻᒪᓗ ᓯᕿᓂᖓᓂ. ᑖᒃᑯᐊ ᓄᓇᑐᕐᓖᑦ ᒪᓂᒪᑎᑦᓯᔪᑦ ᖃᐅᔨᒪᐅᑎᓂᒃ ᐱᐅᓯᑐᖃᕐᑎᒍᑦ ᖃᐅᔨᒪᔭᐅᔪᑐᖃᕐᓂᒃ ᐊᒻᒪᓗ ᐱᓯᑎᐅᓯᒪᓂᖏᓐᓂᒃ ᐊᒥᓱᑦ ᕿᑐᕐᖓᕇᒍᓯᒪᔪᑦ ᓯᕗᓪᓕᕕᓂᖏᓪᓗ ᐃᓕᒍᓐᓇᓯᑦᓯᐊᕋᓱᐊᕐᓂᒥᓂ ᐊᕙᑎᒧᑦ ᐱᒐᓱᐊᒻᒪᕆᓐᓇᑐᒧᑦ. ᓄᓇᕕᒻᒥ, ᐃᓄᐃᑦ ᓄᐃᑕᒍᑎᖃᑦᓯᐊᑐᑦ. Mount Pyramid-ᓗ ᓴᓂᐊᓂ, ᖃᐅᔨᒪᑦᓴᐅᒍᑎᖃᕐᒥᔪᑦ 3000 ᐊᕐᕌᒍᐃᑦ ᐅᖓᑖᓄᑦ ᐊᓂᒍᕐᓯᒪᓕᕐᑎᓗᒋᑦ ᐃᓂᖃᕐᓯᒪᓂᖏᑦ ᐊᓪᓓᑦ ᑯᔩᑦ, ᐃᓄ ᐊᒻᒪᓗ ᓇᔅᑲᐲᑦ. ᓇᔪᕐᑕᐅᓂᖓ ᓄᓇᐅᑉ ᐃᓄᓐᓄᑦ ᐅᓪᓗᒥᒧᑦ ᑲᔪᓯᔪᖅ. ᐊᑐᕐᑕᐅᔪᖅ ᐃᓄᓐᓄᑦ ᐊᒻᒪᓗ ᓇᔅᑲᐱᓄᑦ, ᓄᓇᓕᒪᖅ ᐃᓂᒋᔭᐅᓯᒻᒥᓱᓂ ᑕᑯᔭᕐᑐᕕᐅᓗᓂ ᐊᒻᒪᓗ ᒪᙯᑦᑎᓯᕕᐅᓗᓂ. ᐹᑉ ᒣ, ᐊᐅᓚᑦᓯᔨᒋᓯᒪᔭᖓ George River-ᒥ ᓂᐅᕐᕈᓯᕐᕕᐅᑉ 1943-ᒥᑦ 1952-ᒧᑦ, ᓴᓇᒋᐊᕐᖄᓯᒪᔪᖅ ᒪᙯᑦᑎᓯᕕᓐᓂᒃ George River-ᒥ. ᐅᓪᓗᒥ ᓱᓕ, ᐱᒋᐊᕐᑎᑕᐅᓯᒪᒌᕐᑐᑦ ᒪᙯᑦᑎᓯᕕᐅᕗᑦ Mount Pyramid ᐊᒻᒪᓗ Helen Falls-ᒦᑦᑐᑦ ᐃᖏᕐᕋᖏᓐᓈᓱᑎᒃ. ᐅᓕᑦᑕᓂᐅᔭᓕᐅᑉ ᑐᕌᒐᖏᑦ ᐊᑦᔨᓭᓐᓇᐅᕗᑦ ᑌᒣᑦᑐᖏᓐᓄᑦ ᓴᓂᐊᓃᑦᑑᒃ ᒥᕐᖑᐃᓯᕐᕖᒃ Parc national Kuururjuaq ᐊᒻᒪᓗ ᑑᕐᖓᑦ ᖃᕐᖄᓗᐃᑦ ᑯᐯᒻᒥ ᒥᕐᖑᐃᓯᕐᕖᒃ. ᓄᐃᑕᐅᓂᖓ Parc national Ulittaniujalik ᐅᒃᑯᐃᓯᔪᖅ ᓄᑖᒥᒃ ᐱᕙᓪᓕᐊᓂᐅᓚᖓᓕᕐᒥᔪᒥᒃ ᓄᓇᒥᒃ, ᐱᕙᓪᓕᐊᓯᒪᓂᕐᓂᒃ, ᓯᓚᒥᒃ ᐊᒻᒪᓗ ᓱᓕᔪᓂᒃ ᐊᔪᒉᑦᑐᑕᓕᓐᓂᒃ ᑕᑯᒋᐅᕈᒪᔪᐃᑦ ᑭᒡᒐᑐᕐᓗᒋᑦ. ᖃᐅᔨᒐᓱᐊᖃᑦᑕᓚᖓᕗᓯ. ᑕᑯᒐᓱᐊᖃᑦᑕᓗᒍ ᑕᒪᓐᓇ Facebook-ᒥ!

 

Picture: François Léger-Savard

ᓄᓇᕕᒻᒥ ᓯᑕᒣᕆᓕᕐᑕᖓ ᓄᓇᓕᒫᓂ ᒥᕐᖑᐃᓯᕐᕕᒃ ᓄᐃᑕᐅᓪᓚᕆᑦᓯᒪᓕᕐᑐᖅ ᒪᓕᒐᑎᒍᑦ! ᐊᖏᓂᓕᒃ 5,293 km2 ᐊᒻᒪᓗ ᐅᖑᒪᑦᓯᓂᖃᕐᓱᓂ ᐊᖏᓂᕐᓴᖓᓂᒃ ᐃᓇᖁᓇᕐᑐᒪᕆᐅᑉ ᑲᖏᕐᓱᐊᓗᑦᔪᐊᑉ ᑰᖓᑕ ᑐᑭᐊᓃᑦᑐᒥᒃ ᖃᑦᓯᓂᕐᒥᒃ, ᐅᓕᕐᑕᓂᐅᔭᓕᒃ ᑐᖓᓕᕆᔭᐅᓕᕐᑐᖅ ᑯᐯᒻᒥ ᒥᕐᖑᐃᓯᕐᕖᑦ ᐊᖏᓂᕐᐹᖓᓄᑦ. ᖃᐅᔨᒪᔭᐅᔪᖅ ᓄᓇᖓᑕ ᐊᑦᔨᒌᖕᖏᓂᖃᕐᓂᖓ ᓯᕕᑑᒻᒪᕆᐅᑉ, ᐃᓄᐃᓪᓗ ᓯᕗᓪᓕᕕᓂᖏᑦᑕ ᐃᓗᒡᒍᓯᖃᕈᑎᒋᑦᓱᒍ ᐊᒻᒪᓗ ᑐᖕᖓᓇᕐᓱᑎᒃ ᑖᕙᓂᒥᐅᑦ, ᓄᓇᕕᒃ ᓄᑖᒥᒃ ᒥᕐᖑᐃᓯᕐᕕᑕᖃᓕᕐᑐᖅ ᖁᕕᐊᓲᑎᒋᔭᐅᓕᕐᑐᒥᒃ ᕿᒻᒪᑯᒐᑦᓴᖑᕐᓯᒪᑦᓯᐊᓱᓂ ᐊᕐᖁᑎᒋᑦᓱᒍ ᖃᐅᔨᒪᔭᐅᑦᓯᐊᑐᖅ ᑯᐯᑉ ᒥᕐᖑᐃᓯᕐᕕᓕᕆᕕᖓᑎᒍᑦ.

Ulittaniujalik