Our cultureOur culturehttp://authoring.nunavikparks.ca
​​OUR HISTORY, OUR CULTURE
 

ᓄᓇᕕᐅᑉ ᓯᕗᓪᓕᖃᕐᓯᒪᓂᖓ ᐱᒋᐊᕐᓯᒪᕗᖅ ᑕᐅᓴᓐᑎᒐᓵᓗᓐᓄᑦ ᐊᕐᕌᒍᓄᑦ ᖃᒻᒥᐅᖏᑦᑑᑎᒋᔪᖅ ᐊᒻᒪᓗ ᕿᒻᒪᖁᓯᐊᖑᓕᓂᐅᕗᖅ ᐊᒥᓱᕐᔪᐊᓄᑦ ᑭᖑᕚᕇᓄᑦ ᐃᓄᐃᑦ ᐃᓄᖏᓐᓄᑦ.
ᐃᑦᓴᓂᑕᓕᕆᔩᑦ ᐅᑉᐱᑐᑦ ᐃᓚᒌᑦ ᐃᓄᐃᑦ-ᓯᕗᓪᓕᐹᕕᓂᖏᑦ, ᑐᓃᑦ ᐃᓄᖏᑦ, ᑑᓖᑦ ᐊᒻᒪᓗ ᐃᓄᐃᑦ ᐱᓕᕐᐸᓕᐊᔪᒥᒃ ᐃᕐᐸᓯᒪᒋᐊᖏᓐᓂᒃ ᓄᓇᕕᐅᑉ ᐃᓗᓕᒫᖓᓄᑦ ᐊᕐᕌᒍᐃᑦ 4,500 ᑭᖑᓪᓕᐹᑦ ᐃᓗᐊᓂ. ᑑᓖᑦ, ᑐᕃᓐᓇᓱᑎᒃ ᓯᕗᓪᓕᕕᓃᑦ ᐃᓄᓐᓄᑦ, ᑎᑭᓚᐅᕐᑐᕕᓃᑦ ᑕᒪᐅᖓ 1000 C.E. ᐊᕐᕌᒍᖓᑕ ᒥᑦᓵᓂ. ᓱᕙᓪᓕᓇᕐᑐᓂᒃ ᐊᓐᓇᐅᒪᓂᕐᒥᒃ ᐱᔪᓐᓇᕈᑎᖃᕐᓂᕋᒥᒃ ᐃᓅᒍᓐᓇᓯᒪᔪᑦ ᐃᒃᑮᓇᕐᑐᒥ ᐅᑭᐅᕐᑕᑑᑉ ᓯᓚᖓᓂ. ᐊᐅᓪᓚᑲᑦᑌᓇᕐᑐᒥᒃ ᐃᓅᓯᖃᕐᓱᑎᒃ ᑌᒪᖕᖓᐅᓂᕐᓴᖅ, ᑑᓖᑦ ᐃᓅᓲᕕᓃᑦ ᓄᓇᐅᑉ ᓯᓂᖓᓂ ᐊᒻᒪᓗ ᐆᒪᔪᕐᓯᐅᓂᕐᒥᒃ ᐊᑐᕐᓗᑎᒃ ᑭᓯᐊᓂᐅᓯᒪᑦᓱᑎᒃ - ᐊᒻᒪᓗ ᐃᓱᒪᓯᑎᐅᓂᕐᒥᒃ - ᐃᓅᒍᓐᓇᓂᐊᕋᒥᒃ.
ᑌᒫᑦᓭᓇᒐᓚᒃ, ᐃᓄᐃᑦ ᐃᓅᓯᖓ ᐊᑦᑐᐊᔪᒻᒪᕆᐅᒻᒥᔪᖅ ᓯᓚᕐᔪᐊᑉ ᐊᕙᑎᖏᓐᓄᑦ ᐊᒻᒪᓗ ᐱᑦᓴᖁᑎᖏᓐᓄᑦ. ᖃᐅᔨᒪᑦᓯᐊᕋᒥᒃ ᖃᓄᖅ ᐅᑭᐅᕐᑕᑑᑉ ᐆᒪᔪᖃᐅᑎᖏᑦᑕ ᐊᑦᑕᓇᕐᑐᐊᐱᐅᓂᖓᓂᒃ, ᐃᓄᐃᑦ ᑌᒪᖕᖓᓛᓂᒃ ᐃᑉᐱᒍᓱᑦᓯᐊᑐᒻᒪᕆᐅᑦᓱᑎᒃ ᐊᕙᑎᒥᒃ ᐯᕆᑦᓯᓲᖑᓯᒪᔪᑦ.

 

ᐃᓄᐃᑦ ᐊᒻᒪᓗ ᔨᐅᕈᑉᒥᐅᑦ ᓄᓈᕐᖃᑐᑦ ᖃᐅᔨᐅᑎᒍᑎᖏᑦ ᐱᒋᐊᓚᐅᕐᓯᒪᔪᑦ 1800 ᐊᕐᕌᒍᖏᑦᑕ ᕿᑎᒐᓚᖓᓂ, ᐃᓄᐃᑦ ᐊᒥᓱᑦ ᐃᓅᓚᖓᒐᓗᐊᕐᑎᓗᒋᑦ ᑌᒫᑦᓭᓇᖅ ᓯᕗᓪᓕᕕᓂᕐᒥᑎᑐᑦ 1900 ᐊᕐᕌᒍᖏᑦ ᐱᔪᑐᖃᐅᓕᕋᑕᕐᑎᓗᒋᑦ. ᓵᒋᐊᕐᑎᓯᔩᑦ ᐊᒻᒪᓗ ᒥᕐᖁᓕᓐᓂᒃ ᑕᐅᕐᓯᐅᑎᔩᑦ ᓯᕗᓪᓕᐸᐅᓯᒪᔪᑦ ᓯᕿᓂᕐᒥᐅᓂ ᑎᑭᖃᑦᑕᓯᑦᓱᑎᒃ ᐅᑭᐅᕐᑕᑐᒧᑦ, ᓇᑦᓴᓯᑦᓱᑎᒃ ᐊᑦᔨᐅᖏᑦᑐᓂᒃ ᐱᒻᒪᕆᐅᓕᑦᓯᒍᑎᓂᒃ, ᓄᑖᓂᓪᓗ ᐱᐅᓯᕐᓂᒃ ᐊᒻᒪᓗ ᓴᓇᕐᕈᑎᑦᓯᐊᐸᐅᔮᓗᓐᓂᒃ ᐊᑐᕈᓐᓇᑐᓂᒃ ᐆᒪᔪᕐᓯᐅᓂᕐᒧᑦ, ᐃᖃᓗᓐᓂᐊᓂᕐᒧᑦ ᐊᒻᒪᓗ ᒥᑭᒋᐊᕐᓂᐊᓂᕐᒧᑦ.

ᑲᕙᒪᒃᑯᑦ ᐅᑭᐅᕐᑕᑐᒧᑦ ᓄᐃᑕᐅᕋᑕᕐᒪᑕ ᑭᓯᐊᓂ ᐅᑎᕆᐊᕐᓂᐊᕈᓐᓀᑐᖅ ᐊᓯᑦᔨᐸᓪᓕᐊᓂᖅ ᐱᒋᐊᓕᓚᐅᕐᓯᒪᔪᖅ. ᐃᓄᐃᑦ ᓄᕐᖃᐅᔨᓚᐅᕐᓯᒪᔪᑦ ᐊᐅᓪᓛᑲᑦᑌᓇᕐᑐᒥᒃ ᐃᓅᓯᕐᒥᓂᒃ ᐅᑎᕐᕕᒋᓂᐊᕈᓐᓀᓱᒍ ᐊᒻᒪᓗ ᒪᑭᑦᓯᓚᐅᕐᓯᒪᑦᓱᑎᒃ ᓄᓇᕐᖃᑎᒌᕝᕕᓂᒃ.

ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᖅ, ᐊᑎᓕᐅᕐᕕᐅᓯᒪᔪᖅ 1975-ᒥ, ᓇᐅᓕᒫᓄᑦ ᐃᓕᑕᕆᔭᐅᓲᖑᓕᕐᑐᖅ ᓯᕗᓪᓕᐸᐅᓯᒪᑎᓪᓗᒍ ᓄᑖᔭᐅᑦᓱᓂ ᓄᓇᑖᕐᓂᒧᑦ ᐊᖏᖃᑎᖐᒍᑎᓂ ᑳᓇᑕᐅᑉ ᐃᓗᐊᓂ, ᒪᑭᑦᓯᒍᑕᐅᑦᓱᓂ ᐃᓄᐃᑦ ᐱᖃᕐᓂᖓᓂᒃ ᓄᓇᒥᒃ ᑯᐯᒃ ᐅᑭᐅᕐᑕᑐᖓᓂ ᐊᒻᒪᓗ ᐊᓯᖏᓐᓂᒃ ᐱᔪᓐᓇᓂᕐᑖᕈᑕᐅᑦᓱᓂ. ᑖᓐᓇ ᐊᖏᖃᑎᒌᓐᓂᖅ ᓴᐳᒻᒥᒍᑕᐅᔪᖅ ᐱᐅᓯᑐᖃᒃᑯᑦ ᓄᓇᕕᐅᑉ ᐃᓄᖏᑦᑕ ᐱᔪᓐᓇᓂᖏᓐᓂᒃ ᑐᖕᖓᕕᓕᐅᕐᓯᒪᑦᓱᓂᓗ ᓲᓱᒋᐅᑎᓗᓂ ᑲᒪᒋᐅᑎᓂᕐᒥᒃ ᐊᑯᓐᓂᒥ ᐃᓄᓐᓄᑦ ᐊᒻᒪᓗ ᑲᕙᒪᖓᓄᑦ ᑯᐯᒻᒥ ᐊᒻᒪᓗ ᑳᓇᑕᒥ. ᐊᖏᖃᑎᒌᓐᓂᖅ ᖃᓗᓯᓯᒪᔪᖅ ᐊᒥᓱᐹᓗᓐᓂᒃ ᑲᒪᒍᑎᓂᒃ, ᐃᓚᖃᕐᑎᓗᒋᑦ ᐆᒪᔪᕐᓂᐊᓂᕐᒥᒃ, ᐃᖃᓗᓐᓂᐊᓂᕐᒥᒃ, ᒥᑭᒋᐊᕐᓂᐊᓂᕐᒥᒃ, ᐃᓕᓐᓂᐊᓂᕐᒥᒃ, ᐃᓗᓯᓕᕆᓂᕐᒥᒃ, ᒪᑭᑕᐅᑎᑦᓴᓂᒃ ᐱᕙᓪᓕᐊᓂᕐᒥᒃ ᐊᒻᒪᓗ ᐃᓄᓕᒫᓂᒃ ᐊᐅᓚᑦᓯᔨᐅᓂᕐᒥᒃ.​

menu-blackMain Menu