SafetySafetyhttp://authoring.nunavikparks.ca

ᐱᑦᔪᑎᖃᕐᑎᓗᒍ ᒥᕐᖑᐃᓯᕐᕕᐅᑉ ᐅᖓᓯᓐᓂᖓᓂᒃ, ᐊᓯᑦᔨᑕᕐᑐᒥᓪᓗ ᓯᓚᐅᑉ ᐱᐅᓯᖃᕐᓂᖓᓂᒃ, ᐊᐸᑲᑦᓯᑐᐃᓐᓇᕆᐊᖃᕐᓂᒥᒃ ᐆᒪᔪᓂᒃ ᐊᒻᒪᓗ ᐊᑯᓂᐅᓂᕐᓴᖅ ᐅᐃᒪᓇᕐᑐᖃᓕᕐᒪᑦ ᐱᒍᑦᔨᐅᑏᑦ ᓂᒫᓪᓚᕋᓱᓲᖑᓂᖓᓂᒃ, ᐳᓛᕐᑐᑦ ᖃᐅᔨᒪᑎᑕᐅᑦᓯᐊᕆᐊᓖᑦ ᐊᑦᑕᓇᕐᓯᒍᓐᓇᑐᓂᒃ ᐊᒻᒪᓗ ᐃᓕᒪᓇᕐᑐᓂᒃ ᐊᑦᑐᐊᔪᓂᒃ ᓱᓇᓐᓂᐊᓂᕐᒧᑦ ᓄᓇᕕᒻᒥ ᒥᖑᐃᕐᓯᕐᕖᑦ ᐃᓗᐊᓂ.

ᐊᓯᑦᔨᑕᕐᑐᑦ ᓯᓚᐅᑉ ᐱᐅᓯᖏᑦ

ᓄᓇᕕᒻᒥ, ᓯᓚᐅᑉ ᖃᓄᐃᓐᓂᖓ ᑌᒪᖕᖓᓕᒫᖅ ᐊᓯᑦᔨᑕᓲᖑᕗᖅ. ᑕᒪᑐᒧᖓ ᑭᖑᓂᐅᑎᓪᓗᒍ, ᑕᑯᓂᐊᕐᓯᒪᓃᑦ ᐋᕐᕿᒋᐊᕐᑕᐅᓲᒻᒪᕆᐅᕗᑦ ᓯᓚ ᒪᓕᑦᓱᒍ. ᑎᑭᑦᑐᓴᐅᕗᑎᑦ ᓱᓇᓕᒫᓄᑦ ᐊᑐᐃᓐᓇᐅᓕᕇᕐᓗᑎᑦ, ᖃᓗᓗᒋᑦ ᓯᕿᓂᖅ, ᓱᕈᔪᒃ, ᐊᓄᕆ ᐊᒻᒪᓗ ᖃᓂᒃ. ᓄᓇᕕᒻᒥ ᒥᕐᖑᐃᓯᕐᕕᒧᑦ ᐁᖕᖑᓱᑐᐊᕈᕕᑦ, ᓇᑦᓴᓯᐊᓛᕐᖁᑎᑦ ᐋᕐᕿᒋᐊᕆᐊᓪᓚᕕᖃᑦᓯᐊᓂᕐᒥᒃ ᐊᒻᒪᓗ ᐊᖏᕐᓯᒪᑦᓯᐊᓂᕐᒥᒃ ᐅᓪᓗᓯᐅᑎᑎᑦ ᐊᓯᑦᔨᑐᓚᖓᓗᒋᑦ ᑌᒣᒋᐊᖃᕐᓂᖅ ᒪᓕᓪᓗᒍ.

ᑕᐸᓇᖕᖏᑐᖅ ᐅᑭᐅᕐᑕᑐᒥ ᓯᓚ ᐊᕐᖁᓭᓐᓇᑕᐅᒋᐊᖃᕐᓂᐅᔭᖕᖏᑐᖅ. ᖁᕐᖃᑖᕐᑐᖁᕈᓐᓇᑐᖅ ᑕᒉᓐᐹᒥᒃ ᐅᑭᐅᖑᑎᓪᓗᒍ. ᐃᕐᖃᐅᒪᑦᓯᐊᕆᑦ ᓄᓇᑐᐃᓐᓇᖅ ᓴᐴᓗᑕᖃᖕᖏᒋᐊᖓ ᓯᓚ ᑕᐸᓀᓕᒋᐊᑐᐊᕐᐸᑦ ᐅᕐᖂᓗᑕᑦᓴᓂᒃ. ᖄᒥᐅᑕᖃᖕᖏᑐᖅ ᓄᓇᖓ, ᑕᑯᑦᓴᓂᒃ ᓇᓗᓀᒃᑯᑕᖃᑦᓯᐊᖏᓐᓂᒥᒃ ᐁᑉᐸᖃᓕᕋᒥ, ᐊᔪᕐᓇᖏᑦᑐᒪᕆᐅᑎᑦᓯᔪᖅ ᐳᓛᕐᑐᑦ ᐊᓯᐅᒪᔮᓯᓂᖓᓂᒃ. ᑕᑦᓯᑎᓪᓗᒍ ᑕᑯᕕᑦᓴᐅᖏᑦᑑᒍᓐᓇᒥᔪᖅ ᓇᒧᖕᖓᒪᖔᕐᐱᑦ. ᓇᒧᑦ ᐁᒐᓗᐊᕈᕕᑦ, ᐳᐃᒍᕐᑌᓕᑦᓯᐊᕆᐊᖃᕐᑐᑎᑦ ᐅᖃᓕᒪᐅᑎᓐᓂᐅᕕᑦ, ᐊᑦᑕᓇᕐᑐᒨᕇᒃᑯᑎᓂᒃ ᐊᒻᒪᓗ ᐊᓯᐅᒌᒃᑯᑎᓂᒃ.

ᐆᒪᔪᓂᒃ ᓯᐊᖃᑎᖃᕐᓂᖅ

ᐳᐃᒍᕐᑌᓕᒋᑦ ᑕᒪᓐᓇ ᐆᒪᔪᐃᑦ ᐱᐅᓯᕐᒥᒍᑦ ᐊᓂᕐᕋᕆᒻᒪᒍ ᐊᒻᒪᓗ ᐃᕝᕕᑦ ᐳᓛᕐᑎᐅᒐᕕᑦ. ᐊᑦᑕᓇᕐᓯᒍᑎᒋᓇᒍ ᓯᐊᖃᑕᐅᓚᖓᒍᕕᑦ ᓄᓇᐅᑉ ᐆᒪᔪᖏᓐᓄᑦ, ᐱᐅᓯᖃᕆᐊᖃᕐᑐᑎᑦ ᐃᑉᐱᒍᓱᑦᓯᐊᑐᒥᒃ ᐊᒻᒪᓗ ᓲᓱᑦᓴᑐᒥᒃ.

ᐊᑦᓭᑦ

ᐊᑦᓴᖅ ᒥᑭᓂᕐᐹᖑᕗᑦ ᐃᕐᓯᓇᖕᖏᓂᕐᐸᐅᓱᑎᓪᓗ ᓇᓄᑦᓴᔭᓕᒫᓂ ᐊᒥᐊᔨᑫᑦ ᑕᕐᕋᖏᓐᓂ. ᑖᓐᓇ ᓄᓇᒥ ᐱᓱᑦᑎ ᑌᒪᖕᖓᐅᓂᕐᓴᖅ ᑕᑯᕐᖓᑐᒻᒪᕆᐅᓲᖅ ᐅᕝᕙᓘᓐᓃᑦ ᐃᕐᓯᔪᒻᒪᕆᐅᑦᓱᓂ ᐃᓄᓐᓂᒃ. ᓄᔪᐊᕐᑕᓕᒫᓄᑦ ᐆᒪᔪᓄᑦ ᐊᑦᔨᐅᒍᑎᒋᑦᓱᒍ, ᑭᓯᐊᓂ, ᐊᑦᓭᑦ ᓱᓂᐊᕐᒪᖔᑕ ᖃᐅᔨᒪᓇᓲᖑᖕᖏᑐᑦ ᐊᒻᒪᓗ, ᑌᒣᒍᐊᖕᖏᑲᓗᐊᕐᓱᑎᒃ, ᐃᕐᓯᓇᕿᒍᓐᓇᓲᖑᑦᓱᑎᒃ, ᐱᒋᐊᕈᓐᓇᓱᑎᓪᓗ ᐊᒻᒪᓗ ᐊᓪᓛᑦ ᑲᑉᐱᐊᓇᕐᓯᒍᓐᓇᓱᑎᒃ. ᐊᑦᓭᑦ ᐊᒥᓲᓂᕐᓴᖏᑦ ᐃᓄᓐᓂᒃ ᐱᒋᐊᕐᑐᑦ ᐱᕈᕐᓂᐅᓲᖑᕗᑦ ᐊᖑᑕᐅᑦᓱᑎᒃ ᐅᕝᕙᓘᓐᓃᑦ ᐊᕐᓇᐅᓲᖑᕗᑦ ᕿᑐᕐᖓᖃᕐᓱᑎᒃ. ᐃᑉᐱᒋᔭᐅᓕ ᐊᑦᓭᑦ ᐳᐃᑦᔪᓯᑎᐊᓘᒻᒪᑕ ᐊᒻᒪᓗ ᐸᖓᓕᒍᓐᓇᒪᑕ ᓱᑲᓐᓂᖃᕐᓗᑎᑦ ᑎᑭᐅᑎᔪᒥᒃ 50 km/h-ᒧᑦ. ᐊᑦᓴᐅᑉ ᐃᓅᓯᖓ ᐃᓕᖓᑐᐃᓐᓇᑐᖅ ᓂᕿᓯᐅᒪᓂᕐᒧᑦ. ᐊᑦᓭᑦ ᓂᕆᓲᖑᕗᑦ ᐸᐅᕐᖓᒐᓚᓐᓂᒃ, ᐱᕈᕐᑐᓴᓂᒃ, ᖁᐱᕐᕈᓂᒃ, ᐃᖃᓗᓐᓂᒃ, ᐆᒪᔪᕕᓂᕐᓂᒃ ᐊᒻᒪᓗ, ᐃᓚᖓᓂᒃ, ᑐᒃᑐᐊᕈᐃᑦ ᓄᕐᕋᖏᓐᓂᒃ. ᑕᕐᕿᓂ ᐅᕐᖂᓂᕐᓴᓂ, ᖁᐃᑦᑎᓴᕐᑐᒪᕆᐅᓲᑦ ᓯᑎᒥᓂ ᐆᒪᒍᓐᓇᓂᐊᕋᒥᒃ ᐅᑭᐅᓕᒫᖅ ᐊᒻᒪᓗ, ᐊᕐᓀᑦ ᐱᑦᔪᑎᒋᓗᓗᒋᑦ, ᐊᒫᒪᑦᑎᓯᒍᓐᓇᓂᐊᕋᒥᒃ ᕿᑐᕐᖓᑖᒥᓂᒃ. ᓂᕿᑦᓴᒥᒃ ᓇᕝᕚᖃᔦᖕᖏᐅᒪᓕᕋᒥᒃ ᓇᐹᕐᑐᐃᑦ ᐃᒻᒧᐊᓂ, ᐃᓄᓕᒻᒨᑌᓕᓂᐅᔭᖕᖏᑐᑦ.

ᖃᖓᐅᓕᕐᒪᑦ ᐊᑦᓴᐅᑉ ᐃᓕᒪᓇᕈᓐᓇᓂᖓ:

  • ᐊᑦᓴᖅ ᐅᐸᓗᐃᔭᐅᑐᐊᕐᐸᑦ ᐅᕝᕙᓘᓐᓃᑦ ᖃᓂᓈᕐᕕᐅᓗᐊᑐᐊᕐᐸᑦ.
  • ᐊᕐᓇᖅ ᕿᑐᕐᖓᓕᔭᕐᑐᖅ ᖃᓂᓈᕐᕕᐅᓗᐊᑐᐊᕐᐸᑦ.
  • ᐊᑦᓴᖅ ᒥᓐᓂᐸᑦ ᓂᕿᒥᓂᒃ (ᐆᒪᔪᕕᓂᕐᒥᒃ ᐆᑦᑑᑎᒋᓗᒍ).
  • ᐊᑦᓴᖅ ᐋᓐᓂᓯᒪᑐᐊᕐᐸᑦ, ᖃᓂᒪᑐᐊᕐᐸᑦ ᐅᕝᕙᓘᓐᓃᑦ ᑳᑐᐊᕐᐸᑦ.
  • ᐊᑦᓴᖅ ᐃᓄᓐᓂᒃ ᓂᕿᐅᔪᕆᑦᓯᑐᐊᕐᐸᑦ.

ᐃᓕᒪᓱᒋᑦ ᐊᒻᒪᓗ ᐊᑦᓭᑦ ᓴᓂᐊᓅᕐᑌᓕᓗᑎᑦ ᒪᑯᐊ ᒪᓕᒐᕆᓗᒋᑦ:

  • ᐊᐱᕐᓱᖃᑦᑕᓗᑎᑦ ᒥᕐᖑᐃᓯᕐᕕᐅᑉ ᐱᓇᓱᑦᑎᖏᓐᓂᒃ ᐊᑦᓭᑦ ᐅᕝᕙᓘᓐᓃᑦ ᐱᑕᖃᕐᓂᖓᑕ ᖃᐅᔨᒪᓇᕈᑎᖏᑦ ᑕᑯᔭᐅᓯᒪᒻᒪᖔᑕ ᖃᒻᒥᑯᑦ.
  • ᑲᑎᒪᓗᓯ ᐱᓱᖃᑎᒌᖃᑦᑕᓗᓯ.
  • ᐃᖏᕐᕋᖃᑦᑕᓗᓯ ᐅᓪᓗᑯᑦ ᑭᓯᐊᓂ ᐊᒻᒪᓗ ᐁᑦᑌᓕᖃᑦᑕᓗᓯ ᓇᒧᒐᓚᒃ ᑕᑯᓐᓇᓯᐊᕐᓇᖏᑦᑐᒧᑦ.
  • ᐃᑉᐱᒍᓱᑦᓯᐊᕆᐊᓪᓚᓗᓯ ᐱᓱᓕᕈᑦᓯ ᑰᑉ ᓴᓂᐊᒍᑦ - ᐊᑦᓭᑦ ᑰᓐᓂᒃ ᐊᕐᖁᑎᖃᓲᒻᒪᕆᐅᕗᑦ.
  • ᖃᓂᑦᑐᒦᒋᐊᕐᐱᑦ ᖃᐅᔨᒪᔭᐅᑎᖃᑦᑕᓗᑎᑦ ᓱᕐᕙᓛᔪᒥᒃ ᓂᕕᖓᑦᓯᓗᑎᑦ ᓇᒻᒪᒑᕐᓂᒃ. ᐅᖄᓗᑎᑦ, ᐃᖕᖏᐅᒐᕐᓗᑎᑦ ᐅᕝᕙᓘᓐᓃᑦ ᐅᕕᖕᖏᐅᓱᕐᓗᑎᑦ ᐱᓱᓐᓂᓂ.
  • ᐊᑦᓭᑦ ᐱᑕᖃᕆᐊᖏᑦ ᖃᐅᔨᒪᓇᕈᑎᓂᒃ ᕿᓂᕐᓗᑎᑦ (ᑐᒥᓂᒃ, ᐊᓇᕐᓂᒃ, ᕿᑦᓱᓂᑯᓂᒃ ᐅᕝᕙᓘᓐᓃᑦ ᐊᒦᔭᕐᓯᒪᔪᓂᒃ ᓇᐹᕐᑐᓂᒃ).
  • ᓇᑦᓴᑌᓕᓗᑎᑦ ᑎᐸᕆᑦᑐᓂᒃ ᓂᕿᓂᒃ ᐅᕝᕙᓘᓐᓃᑦ ᐃᓅᑉ ᑎᑉᐸᐅᑎᖏᓐᓂᒃ.
  • ᐴᕐᓯᒪᑎᑦᓯᖃᑦᑕᓗᑎᑦ ᓂᕿᓂᒃ ᓴᓂᕐᓂᓘᓐᓃᑦ ᐊᑦᓴᓄᑦ ᐊᒻᒪᑕᐅᕈᓐᓇᖏᑦᑐᓂ ᐃᑦᓯᕕᓐᓂ ᐅᕝᕙᓘᓐᓃᑦ ᒪᑐᓯᒪᑦᓯᐊᑐᓂ ᐃᑉᐱᐊᔪᓐᓂ, ᐊᒻᒪᓗ ᑖᒃᑯᐊ ᐅᖓᓯᑦᑑᑎᖃᕐᑕᓗᒋᑦ ᑐᐱᕐᕕᓯᓐᓂᒃ.
  • ᓱᕐᖁᐃᓯᐊᕐᓗᑎᑦ ᓯᓂᕝᕕᒋᓚᖓᔦᑦ ᐊᒻᒪᓗ ᓂᕿᓕᕆᕖᑦ ᐃᑭᓐᓂᐹᖓᓄᑦ 50-ᓄᑦ ᐃᓵᑦᑕᓄᑦ ᐅᖓᓯᑕᕇᓐᓂᖓᓂᒃ. ᓇᔪᕐᑕᑎᑦ ᓴᓗᒪᑎᖏᓐᓇᖃᑦᑕᓗᒋᑦ. ᒪᕐᕋᓕᕆᖃᑦᑕᓗᑎᑦ ᐊᒻᒪᓗ ᒪᕐᕋᓕᕆᐅᑎᐅᑉ ᐃᒪᖓ ᐃᒋᖃᑦᑕᓗᒍ ᑐᐱᕐᕕᓯ ᐅᓯᑖᓄᑦ.

ᐊᑦᓴᒥᒃ ᑲᑎᓯᑦᓴᓂᐊᕈᕕᑦ:

  • ᐊᑦᓴᐅᑉ ᓂᐊᖁᖓ ᐅᑯᖓᑐᐊᕐᐸᑦ ᐊᒻᒪᓗ ᓱᓇᓱᐊᖏᓐᓇᑐᐊᕐᐸᑦ, ᑌᒪ ᑌᑲᓃᒋᐊᕐᐱᑦ ᖃᐅᔨᕋᑕᖕᖏᓚᖅ. ᐅᐃᒻᒪᓂᐅᔭᕐᑌᓕᓗᑎᑦ ᓱᕐᕙᓗᓕᐅᕈᓐᓀᓗᑎᓪᓗ ᕿᒪᖕᖒᔭᕐᓗᒍ.
  • ᐊᑦᓴᐅᑉ ᓂᐊᖁᖓ ᒪᑭᑕᑉᐸᑦ ᑕᑯᒋᐊᖕᖓᑌᓐᓂ, ᑕᒪᓐᓇ ᑐᑭᓕᒃ ᑐᓴᕆᐊᖓᓂᒃ ᓱᓇᒥᑭᐊᖅ ᐅᕝᕙᓘᓐᓃᑦ ᐃᓕᓐᓂᒃ ᓀᓂᖓᓂᒃ. ᐱᓱᒍᓐᓀᕆᑦ. ᑌᑲᓃᒋᐊᕐᐱᑦ ᖃᐅᔨᑎᑦᓯᐊᓗᒍ. ᐅᖃᐅᑦᔪᓗᒍ ᓂᐱᕆᑦᑑᒍᓐᓀᓗᑎᑦ. ᑕᓖᒃᑭᓄᑦ ᓄᓗᕋᕐᓗᑎᑦ ᐃᓅᒋᐊᕐᐱᑦ ᖃᐅᔨᓂᐊᕐᒪᑦ. ᑭᖑᑉᐱᐊᓗᑎᑦ ᓱᒃᑫᑐᒥᒃ ᓴᑑᒪᓇᕐᓂᓴᒧᑦ ᐁᓗᑎᑦ ᐅᕝᕙᓘᓐᓃᑦ ᐅᖓᓯᓈᕐᓗᑎᑦ ᓂᒍᕐᓗᒍ ᐊᑦᓴᐅᑉ ᓇᔪᕐᑕᖓ ᐅᐸᑦᑌᓕᓗᒍ. ᑕᒪᓐᓇ ᓱᒋᐊᓪᓚᕕᖃᖕᖏᐸᑦ, ᕿᑲᑦᓯᐊᓗᑎᑦ ᐅᑕᕐᕿᓗᑎᓪᓗ ᐊᑦᓴᖅ ᕿᒪᑦᓯᓯᐊᕆᓗᒍ. ᐊᕐᖁᑎᑦᓴᖃᕐᑎᓯᐊᕐᓗᒍ ᕿᒪᑦᓯᕕᑦᓴᖓᓂᒃ.
  • ᐊᑦᓴᖅ ᒥᑦᓯᓄᐊᓯᑐᐊᕐᐸᑦ, ᑕᓖᒃᑭᓄᑦ ᓄᓗᕋᕐᓗᑎᑦ. ᑭᖑᑉᐱᐊᓗᑎᑦ ᐊᒻᒪᓗ ᓂᐱᕆᑦᑑᒍᓐᓀᓗᑎᑦ ᐅᖃᐅᑦᔪᓗᒍ. ᑲᑉᐱᐊᓇᕿᖕᖏᑐᒥᒃ ᐱᕕᓕᒫᑦᓯᐊᖓᓄᑦ ᐱᐅᓯᖃᕋᓱᐊᕐᓗᑎᑦ. ᕿᒫᒍᓐᓀᓗᑎᑦ. ᐃᓕᓐᓂᒃ ᓴᖑᑎᒐᓱᓪᓗᒍ ᓱᓇᒐᓚᒻᒥᒃ ᑲᑌᓗᑎᑦ.
  • ᐊᑦᓴᒧᑦ ᐸᖓᓕᕝᕕᐅᓯᒍᕕᑦ, ᓵᖕᖓᖏᓐᓇᓕᒫᕐᓗᒍ. ᐃᕐᓯᓕᕐᑎᒐᓱᐊᕐᓗᒍ ᓲᖑᓂᕐᓴᐅᔮᕋᓱᐊᕐᓗᑎᑦ. ᓱᓇᒐᓚᓐᓂᒃ ᑲᑦᔪᑕᕐᑎᓯᓗᑎᑦ ᐊᒻᒪᓗ ᓂᐱᕆᑦᓯᒋᐊᓪᓚᕆᓪᓗᑎᑦ. ᑕᓖᒃᑭᒃ ᓂᐊᖁᕐᐱᑦ ᖁᓛᓂ ᓄᓗᕋᑦᑕᕖᖕᖏᓗᒋᒃ ᐊᒻᒪᓗ ᒥᓯᑦᑕᓗᑎᑦ ᐊᖏᓂᕐᓴᐅᔮᕐᓂᐊᕋᕕᑦ ᑕᑯᓐᓇᑕᖓᑎᒍᑦ. ᑌᒪᖕᖓᐅᓂᕐᓴᖅ ᐊᑦᓴᖅ ᓄᕐᖃᓚᖓᔪᖅ ᐃᓵᑦᑕᓄᑦ ᐊᒥᓲᖕᖏᑐᓄᑦ ᐅᖓᓯᓐᓂᖃᓕᕈᓂ ᐃᓕᓐᓄᑦ ᑌᒪ ᑐᓄᑐᐃᓐᓇᓗᓂ ᕿᒪᑦᓯᓂᐊᓕᕋᒥ. ᐊᑦᓴᒧᑦ ᐅᐸᑦᑕᐅᖏᓐᓇᕈᕕᑦ, ᐃᒻᒥᓂᒃ ᓴᐳᑎᒋᐊᖃᓕᕐᑐᑎᑦ ᐊᑭᒪᔪᒋᐊᕐᓗᒍᓗ. ᐊᑐᕐᓗᑎᑦ ᐅᔭᕋᕐᓂᒃ ᐊᒻᒪᓗ ᐊᒡᒐᓅᕕᑦ ᑎᓪᓗᖃᑦᑕᓗᒍ, ᐊᔭᐅᑉᐱᐊᓄᑦ ᐊᓇᐅᓕᕐᓗᒍ ᐊᓯᐊᓄᓪᓘᓃᑦ ᓱᓇᑐᐃᓐᓇᒧᑦ ᓇᕝᕚᕈᓐᓇᑕᕐᓅᕕᑦ. ᑭᖑᓪᓕᐹᑦᓯᐊᒥᒃ ᓱᒋᐊᓪᓚᕖᕈᑉᐸᑦ, ᐸᑦᑕᑎᑐᑦ ᑎᒦᑦ ᐃᕿᖓᑎᓪᓗᒍ ᐊᒻᒪᓗ ᑐᖁᖓᖕᖑᐊᓯᓗᑎᑦ.

ᓇᓄᐃᑦ

ᓇᓄᖅ ᐊᖏᓂᕐᐹᖑᕗᖅ ᓄᓇᒥᐅᑕᓂ ᐆᒪᔪᕐᓂᐊᑎᓕᒫᓂ ᐊᒥᐊᔨᑫᑦ ᑕᕐᕋᖓᓂ. ᐊᖑᒃᔪᐊᑦ ᐅᖁᒣᓐᓂᖃᕈᓪᓕᐅᓲᑦ 300-450 kg-ᓂᒃ ᐊᒻᒪᓗ ᑎᒥᖏᑦ ᑕᑭᓂᖃᓲᖑᑦᓱᑎᒃ 3-ᓂᒃ ᐃᓵᑦᑕᓂᒃ ᕿᖓᖓᑕ ᓄᕗᐊᓂᒃ ᐱᒋᐊᕐᓱᒍ ᐸᒥᐅᖓᑕ ᐃᓱᐊᓄᑦ ᑎᑭᑦᓱᒍ. ᓇᓄᐃᑦ ᓲᖑᔪᐊᓘᕗᑦ, ᓱᑲᑦᑐᐊᓘᑦᓱᑎᓪᓗ ᐊᒻᒪᓗ ᐃᖃᖕᖏᑐᒻᒪᕆᐅᕗᑦ ᓄᓇᒥ ᐊᒻᒪᓗ ᓯᑯᒥ ᑕᒣᓐᓂ. ᐳᐃᑦᔪᓯᑎᒻᒪᕆᐊᓘᒻᒥᔪᑦ ᐊᕐᖃᐅᒪᒍᓐᓇᓱᑎᓪᓗ. ᓇᓄᐃᑦ ᑕᑯᑦᓱᒋᑦ ᓱᒃᑫᑐᕐᔫᔮᕈᓐᓇᑐᑦ ᓄᔪᐃᑦᑐᐊᐱᐅᔮᕐᓗᑎᓪᓗ ᐅᐱᕐᖔᑯᑦ ᐅᕐᖂᕉᑕᕆᓂᖓᓂ, ᑭᓯᐊᓂ ᐊᐅᓚᒍᓐᓇᑐᑦ ᓱᑲᑦᑐᐊᓗᒻᒥᒃ ᐊᒻᒪᓗ ᑐᑭᓕᒻᒪᕆᐅᓗᑎᒃ. ᓀᒍᐊᕐᑐᒪᕆᐊᓗᐃᑦ ᐊᒻᒪᓗ ᑕᐅᑐᓐᓂᖓᑦ ᐅᕙᑦᑎᓄᑦ ᐆᑦᑑᑎᓪᓗᐊᖑᑦᓱᓂ. ᐃᕐᓯᓕᕈᐊᕐᑐᐹᓗᐃᑦ ᐊᒻᒪᓗ ᐃᓄᓐᓂᒃ ᐅᕝᕙᓘᓐᓃᑦ ᐊᓯᒥᓂᒃ ᓇᓄᕐᓂᒃ ᑲᑎᓯᒍᒪᖕᖏᑐᒻᒪᕆᐅᓲᖑᑦᓱᑎᒃ. ᐆᒪᔪᕐᓂᐊᒐᓖᑦ ᓇᑦᓯᓂᒃ ᐱᓗᐊᕐᑐᖅ ᑭᓯᐊᓂ ᐃᓚᖓᓂᒃ ᒪᓐᓂᑑᒪᓲᖑᒻᒥᔪᑦ ᐅᕝᕙᓘᓐᓃᑦ ᑎᒻᒥᐊᓂᐊᖃᑦᑕᓱᑎᒃ, ᒥᑭᔪᖑᐊᓂᓪᓘᓃᑦ ᐆᒪᔪᓂᒃ ᐅᕝᕙᓘᓐᓃᑦ ᐃᓄᓐᓂᒃ ᐊᓪᓛᑦ. ᕿᓂᔭᓲᖑᒻᒥᔪᑦ ᓂᕿᐅᒍᓐᓇᑐᓂᒃ, ᓂᕆᓲᖑᑦᓱᑎᓪᓗ ᓯᑦᔭᓕᔭᐅᓂᑯᐃᑦ ᕿᓚᓗᒐᕕᓃᑦ ᑎᒥᖏᓐᓂᒃ ᐅᕝᕙᓘᓐᓃᑦ ᓴᓂᕐᓂᒃ ᐃᓄᐃᑦ ᕿᒪᑦᑕᕕᓂᖏᓐᓂᒃ.

ᐃᓕᑦᓯᓂᒃ ᐊᔭᐅᕐᐳᒍᑦ ᐊᑐᐊᕐᓯᖁᑦᓱᓯ ᒥᕐᖑᐃᓯᕐᕕᓕᕆᔩᑦ ᑳᓇᑕᒥ ᐊᓪᓚᖁᑎᖏᓐᓂᒃ ᐊᑦᑕᓇᕐᓯᑌᓕᓂᖅ ᓇᓄᐃᑦ ᓄᓇᖓᓂ.

ᐊᒪᕈᐃᑦ

ᐊᒪᕈᐃᑦ ᒥᕐᖁᖏᑦ ᑕᐅᑦᑐᖃᓲᖑᕗᑦ ᖃᑯᕐᑕᒥᒃ ᐱᒋᐊᕐᓱᒍ ᕿᕐᓂᑕᒧᑦ ᑎᑭᑦᓱᒍ, ᑭᓯᐊᓂ ᑌᒪᖕᖓᐅᓂᕐᓴᖅ ᐊᕐᔭᑎᑐᑦ ᐃᓱᕐᑕᒥᒃ ᑕᐅᑦᑐᖃᓲᑦ, (ᕿᕐᓂᑕᓂᒃ ᒥᕐᖁᖃᕐᓱᑎᒃ ᐸᒥᐅᖓᑕ ᐃᓱᐊᓂ). ᐊᒪᕈᐃᑦ ᓂᒪᓐᓂᓴᐅᓲᑦ ᐅᓐᓄᐊᑯᑦ ᐅᓪᓘᓂᖓᓂ ᑕᙯᕐᓯᖃᑦᑕᓱᑎᒃ, ᐊᖁᐱᑐᐃᓐᓇᖃᑦᑕᓱᑎᒃ ᐊᒻᒪᓗᑭᑖᖕᖑᓱᑎᒃ ᓄᓇᐅᑉ ᐅᕝᕙᓘᓐᓃᑦ ᐊᐳᑎᐅᑉ ᖃᖓᓂ. ᐊᒪᕈᐃᑦ ᐃᓚᒌᖑᑦᓱᑎᒃ ᐊᐅᓚᓲᖑᕗᑦ ᐊᒻᒪᓗ ᑖᓐᓇᑑᓲᖑᓪᓗᐊᖏᓪᓚᑦ ᓇᔪᕐᑕᒥᓂ. ᐊᒻᒪᕉᖃᑎᒌᑦ ᐋᕐᕿᓱᕐᓯᒪᔪᐹᓗᒻᒥᒃ ᐊᖓᔪᕐᖄᖃᕈᑎᓖᑦ ᐊᒪᕈᐃᑦ ᑕᓪᓕᒪᓂᒃ ᐱᒋᐊᕐᓱᒍ ᓯᑕᒪᐅᔪᕐᑐᓄᑦ ᐅᖓᑖᓄᓪᓘᓃᑦ ᑎᑭᑦᓱᒍ ᐃᓚᒌᖑᑎᓪᓗᒋᑦ, ᓯᕗᓕᕐᑎᖃᕐᓱᑎᒃ ᐊᖑᑎᒥᒃ ᓲᖑᓂᕐᐹᒥᒃ. ᐆᒪᔪᕐᓂᐊᑕᒥᓂᒃ ᓱᒃᑫᓂᕐᓴᐅᓲᖑᒐᒥᒃ ᑌᒪᖕᖓᐅᓂᕐᓴᖅ, ᑖᒃᑯᐊ ᓯᓚᑉᐹᓗᐃᑦ ᐆᒪᔪᕐᓂᐊᑏᑦ ᐃᑲᔪᕐᑎᒌᑦᓱᑎᒃ ᐆᒪᔪᕐᓂᐊᓲᖑᕗᑦ ᐊᒻᒪᓗ ᐱᓇᓱᐊᓲᖑᕗᑦ ᐱᑐᖃᐅᓕᕐᑐᓂᒃ ᐅᕝᕙᓘᓐᓃᑦ ᐱᒡᒐᓗᑦᑐᓂᒃ ᐆᒪᔪᓂᒃ, ᐅᕝᕙᓘᓐᓃᑦ ᐃᓅᓕᕋᑖᕖᖕᖓᓂᒃ ᐊᓯᖏᓐᓂᓘᓐᓃᑦ ᐊᔪᕐᖃᔦᕐᑐᓂᒃ ᐊᐳᑎᒥ ᐅᕝᕙᓘᓐᓃᑦ ᓯᑯᒥ. ᐊᒪᕈᐃᑦ ᐆᒪᔪᕐᑕᕕᓂᕐᒥ ᐃᓚᖓᓂᒃ ᓴᐅᔨᓲᖑᒻᒥᔪᑦ ᓯᐊᕈᒋᐊᖅ ᓂᕆᔭᑦᓴᕆᑦᓱᒍ, ᑭᓯᐊᓂ ᑲᒪᒍᒪᓪᓗᐊᓲᖑᑦᔭᖏᑦᑐᑦ ᐊᓯᖏᓐᓂᒃ ᐆᒪᔪᕕᓂᑐᖃᕐᓂᒃ. ᐊᒪᕈᐃᑦ ᓂᕆᓲᖑᕗᑦ ᐆᒪᔪᒻᒪᕆᓐᓂᒃ ᐱᓗᐊᕐᑐᖅ ᐆᑦᑑᑎᒋᓗᒋᑦ ᑐᒃᑐᐊᕈᕐᓂᒃ, ᑐᒃᑐᕙᕐᓂᒃ ᐊᒻᒪᓗ ᑐᒃᑐᑐᐃᓐᓇᓂᒃ. ᐅᐱᕐᖔᖑᓂᖓᓂ, ᓂᕆᔭᒥᓄᑦ ᐃᓚᔨᓲᑦ ᒥᑭᔪᖑᐊᓂᒃ ᐆᒪᔪᓂᒃ ᐆᑦᑑᑎᒋᓗᒋᑦ ᐅᑲᓖᑦ, ᓄᓇᐅᑉ ᐃᓗᐊᓂᒥᐅᑌᑦ, ᑭᒋᐊᑦ ᐊᒻᒪᓗ ᓄᓂᕙᒃᑲᒐᓓᑦ, ᐊᒻᒪᓗ ᐃᓚᖓᓂᒃ ᓂᕆᓲᖑᒻᒥᓱᑎᒃ ᑎᒻᒥᐊᓂᒃ, ᐃᖃᓗᓐᓂᒃ, ᖁᐱᕐᕈᓂᒃ ᐊᒻᒪᓗ ᐸᐅᕐᖓᓂᒃ. ᐊᒪᕈᐃᑦ ᐃᓄᓐᓂᒃ ᐱᒋᐊᕈᓪᓕᐅᔭᖏᑦᑐᑦ.

ᐊᒪᕈᕐᒥᒃ ᑲᑎᓯᑦᓴᓂᐊᕈᕕᑦ:

  • ᐅᐃᒻᒣᔭᐅᑦᑌᓕᒋᑦ.
  • ᑕᒡᒍᒧᑦ ᐊᖏᓂᕐᓴᐅᔮᕋᓱᓪᓗᑎᑦ ᐊᒪᕈᕐᒥᒃ.
  • ᐊᒪᕈᖅ ᕿᒪᑦᓯᕕᑦᓴᖓᓂᒃ ᐊᕐᖁᑎᖃᕐᑎᓯᐊᕐᓗᒍ.
  • ᐊᒪᕈᖅ ᑐᓄᑦᑌᓕᓗᒍ, ᐊᒻᒪᓗ ᑕᑯᑦᓴᒦᑦᑎᖏᓐᓈᓗᒍ.
  • ᓱᕐᕙᓛᑎᑦᓯᓗᑎᑦ, ᐊᒡᒐᑎᓐᓄᑦ ᐸᑎᒐᕐᓗᑎᑦ, ᙯᒐᓕᓗᑎᑦ, ᐊᒻᒪᓗ ᓴᐱᓕᕐᓭᒍᑎᓂᒃ ᐊᑐᕐᓗᑎᑦ.
  • ᑌᒫᒃ ᑭᓯᐊᓂᐅᑉᐸᑦ, ᐅᔭᕋᕐᓄᑦ ᐊᒪᕈᖅ ᒥᓪᓗᓗᒍ ᐅᕝᕙᓘᓐᓃᑦ ᐸᐸᓕᒻᒧᑦ ᓱᐱᔭᐅᑎᓪᓗᒍ.
  • ᕿᒫᑦᑌᓕᓗᑎᑦ, ᐊᒪᕈᕐᒧᑦ ᐅᐸᓛᕆᔭᐅᓯᑦᓴᕈᐊᕋᕕᑦ, ᐃᓱᒪᔪᒧᑦ ᐱᔭᑦᓴᒪᕆᐊᓘᓕᕆᐊᕐᐱᑦ.
  • ᐹᔭᐅᓯᒍᕕᑦ, ᐱᕕᓕᒫᖓᓄᑦ ᐊᑦᓱᕈᕐᓗᑎᑦ ᐊᑭᒪᔪᒋᐊᕐᓗᑎᑦ.

ᐅᖑᒪᑦᓯᒍᑏᑦ

ᐆᒪᔪᓂᒃ ᐊᐸᑲᑦᓯᑌᓕᓂᖅ ᑲᑉᐱᐊᓇᕐᑐᒨᕇᒃᑯᑎᕆᓗᒍ ᐱᐅᓂᕐᐸᐅᕗᖅ. ᑐᖁᓐᓇᖏᑦᑐᑦ ᓴᐱᕐᓵᕆᒍᑏᑦ ᐱᔭᑦᓴᐅᕗᑦ ᑲᑎᓯᔪᖃᑦᓴᓂᐊᕐᐸᑦ ᐊᑦᓴᓂᒃ (ᐊᒻᒪᓗ ᑲᔪᐊᓗᓐᓂᒃ ᐊᑦᓴᒪᕆᐊᓗᓐᓂᒃ), ᑭᓯᐊᓂ ᑖᒃᑯᐊ ᓴᐱᕐᓵᕆᒍᑏᑦ ᓱᕐᖁᐃᔭᖏᒻᒥᔪᑦ ᑕᑎᑦᓴᐅᒐᑎᓪᓗ ᐊᑦᑕᓇᕐᑐᒨᕇᒃᑯᑎᑐᐊᕆᓗᒋᑦ ᓇᓄᕐᒧᑦ ᐱᒋᐊᕐᑕᐅᓴᕐᓂᐊᕈᕕᑦ. ᑌᒪᖕᖓᓕᒫᑦᓯᐊᖅ, ᐊᑐᐃᓐᓇᐅᒋᐊᖃᕐᑐᑎᑦ ᖃᐅᔨᒪᓗᑎᓪᓗ ᓱᓀᑦ ᑎᑭᐅᑎᔮᑦ ᐊᑐᕈᓐᓇᒪᖔᑕ ᐱᒋᐊᕈᑎᑦᓴᕆᓗᒋᑦ (ᓯᑐᖃᐅᓯᔭᕈᑏᑦ, ᕿᔪᐃᑦ, ᓴᕖᑦ, ᐊᓯᖏᓪᓗ).

ᓱᕐᕙᓛᒍᑏᑦ, ᖃᓗᓗᒋᑦ ᖁᖁᐊᕈᑏᑦ ᐊᒻᒪᓗ ᐃᓪᓗᐃᓇᕐᑑᑎᒧᑦ ᐅᕝᕙᓘᓐᓃᑦ ᐊᓪᓚᐅᑕᐅᔭᒧᑦ ᖁᒻᒧᐊᑎᑦᓯᒍᑏᑦ (ᓇᓄᕐᓄᑦ ᓱᕐᕙᓛᒍᑏᑦ), ᓴᖑᑎᑦᓯᒍᓐᓇᑐᑦ ᓇᓄᕐᓂᒃ.

ᐸᐸᒥᒃ ᓱᐱᓯᒍᑏᑦ ᐆᒪᔪᐃᑦ ᐃᓚᖏᓐᓂᒃ ᕿᒪᑦᓯᑎᑦᓯᒍᓐᓇᑐᑦ ᐃᓕᑦᓯᓂᒃ, ᑭᓯᐊᓂ ᓱᕐᖁᐃᑕᐅᓯᒪᖕᖏᑐᑦ ᓱᕙᓪᓕᖁᑕᐅᒻᒪᖔᑕ ᓇᓄᕐᓄᑦ ᐊᒻᒪᓗ ᐱᔪᓐᓇᒥᒐᑎᒃ ᐃᒃᑮᓇᕐᑎᓗᒍ ᓯᓚ.

ᓇᑦᓴᑲᑦᑕᒐᖅ ᐊᑦᓱᓈᖅ ᓈᑲᑦᑕᕕᒃ ᐅᕝᕙᓘᓐᓃᑦ ᓂᒪᑦᑐᒥᒃ ᖃᐅᔨᒍᑏᑦ ᑐᐱᕐᕕᓯ ᐊᕙᑖᒍᑦ ᐋᕐᕿᓱᕐᓯᔪᑦ ᖃᐅᔨᒍᑎᒋᒍᓐᓇᑕᓯ ᐆᒪᔪᐃᑦ ᑐᐱᕐᕕᓯᓐᓄᑦ ᑎᑭᓯᑉᐸᑕ. ᓇᑦᓴᑲᑦᑕᒉᑦ ᓯᕿᓂᕐᒥᒃ-ᐃᑯᒪᐅᑎᓖᑦ ᖁᑦᓴᓚᓐᓇᑐᑦ ᓭᒍᐃᑦ ᐊᑦᓴᒥᒃ ᓴᐱᓕᕐᑎᓯᒍᓐᓇᑐᑦ ᐃᑎᕆᐊᕐᑎᓗᒍ ᑐᐱᕐᕕᓯᓐᓄᑦ ᐋᕐᕿᑕᐅᓯᒪᑦᓯᐊᑐᐊᕈᑎᒃ ᐊᒻᒪᓗ ᐱᔪᓐᓇᑎᑕᐅᑦᓯᐊᑐᐊᕈᑎᒃ.

ᐃᓱᒪᒋᔭᑦᓴᓚᕇᑦ:

  • ᑖᒃᑯᐊ ᓴᐱᓕᕐᓭᒍᑏᑦ ᐆᑦᑐᕋᕐᐸᓗᒋᑦ ᐊᐅᓪᓚᖏᓐᓂᓯᓐᓂ.
  • ᑌᒣᑦᑐᐃᑦ ᓴᓇᒉᑦ ᐱᔭᑦᓴᐅᖏᑐᐃᓐᓇᕆᐊᖃᕐᒪᑕ ᑕᕐᕋᒥ, ᓂᐅᕕᕐᑐᓴᐅᕗᓯ ᑌᒣᑦᑐᓂᒃ ᓄᓇᓂ ᐊᓯᖏᓐᓂ ᐊᐅᓪᓚᑎᑦᓯᓗᓯᓗ ᐊᑦᑕᓇᕐᑐᓂᒃ ᐅᓯᒍᑕᐅᓂᖏᑦ ᓇᓗᓀᒃᑯᑕᖃᕐᑎᓗᒋᑦ.
  • ᓇᓄᖃᕐᓂᐊᖒᓯᒍᑦᓯ ᐅᐸᓚᖓᔭᓯᓐᓂᒃ, ᑎᒡᒍᐊᓯᓗᓯ ᐃᓄᒻᒥᒃ ᐅᖑᒪᑦᓯᔨᑦᓴᒥᒃ ᐅᕝᕙᓘᓐᓃᑦ ᐊᓯᐊᓂᒃ ᑐᐱᕐᕕᖃᕋᔭᕐᓂᒥᒃ ᐃᓱᒪᓗᓯ.​
menu-blackPlan-Visit